अर्थमन्त्रीलाई गगन थापाको प्रश्न : विदेशबाट फर्किने युवाका लागि खै ठोस योजना ?

प्रकाशित मिति : २०७७ बैशाख ३० मंगलबार
तस्बिर : फाइल

काठमाडौं। नेपाली कांग्रेसका नेता तथा सांसद गगनकुमार थापाले कोरोनाका कारण सृजित अवसरलाई उपयोग गर्ने संकल्प, साहस र सृजनात्मकता सरकारले देखाउन नसकेको टिप्पणी गरेका छन्। प्रतिनिधि सभाको बैठकमा आज पूर्व बजेट छलफलमा भाग लिदैँ उनले अर्थमन्त्री डा युवराज खतिवडाले पेश गरेको प्रस्तावमा नयाँपन केही नभेटिएको बताए।

नवप्रबद्र्धनको मौका, डिजिटल गराउने असर तर्फ पनि सरकारको पट्क्कै ध्यान नभएको काँग्रेस नेता थापाको भनाई थियो। अर्थमन्त्री खतिवडाले करको दायर बढाउने पुरानै सिद्धान्तलाई आधार मानेको भन्दै उनले सार्वजनिक खर्च घटाउने यस्तो अवसर आउदा पनि अर्थमन्त्रीले साहस गर्न नसकेको टिप्पणी गरे।

विदेशबाट फर्किन लागेर र स्वदेशमै पनि बेरोजगार भएका लाखौ नेपालीका लागि अर्थमन्त्री खतिवडाले ठोस कुनै योजना ल्याउने छाटकाँट नदेखाएको भन्दै थापाले आक्रोस पोखे। उनले भने, “लाखौ मानिस स्वदेश आउदैछन्, उनीहरुको बारेमा कुनै चिन्ता अर्थमन्त्रीमा देखिएन।”

कोरोनापछि कृषि र साना उद्योगहरुलाई प्राथमिकता दिनुपर्छ भनेको मात्रै सुनेको तर शिक्षा र स्वास्थ्यको राम्रो व्यवस्था नगर्दासम्म गाउँमा रहेकाहरुलाई गाउमै टिकाउन सकिन्न भन्ने तर्फ कसैको ध्यान नगएको उनले बताए।

हरेक गाउँ गाउँमा कस्तो अस्पताल बनाउनु पर्छ, कस्तो आवश्यकता छ भन्ने लगायतको सम्पूर्ण योजना सहितको अध्ययन प्रतिवेदन २०७४ सालदेखि स्वास्थ्य मन्त्रालयमा थन्किएको तर्फ उनले सरकारको ध्यानाकर्षण गराए। धेरै विद्धान र विज्ञहरुले धेरै मेहनेत गरेर बनाएको प्रतिवेदनलाई सरकारले एक पल्ट पनि पल्टाउने चेष्ट नगरेको भन्दै उनले दुःख व्यक्त गरे।

नेपालका उद्योगहरुलाई निजिकरण गरिएको भन्दै विगतमा चर्को विरोध गर्ने सत्तारुढ दललाई अहिले सार्वजनिक उद्योगहरु खोल्न चुनौति पनि उनले भने। 
उद्योगहरुलाई निजिकरण गरेर देशलाई बर्दाद पारियो भन्ने सत्तारुढ दललाई अहिले आफ्नो सरकार मार्फत उद्योग चलाउने आँट छ ? भनेर नेता थापाले प्रश्न गरे। 

उनले निजिकरण गरेको कारणले नभई अन्य कारणले नेपालका उद्योग धन्दाहरु धारासायी भएको बताउदै यसलाई पुनर्उत्थान गर्ने तर्फ सरकारले यो अवसरलाई अधिकतम उपयोग गर्नुपर्नेमा जोड दिए।

छलफलका लागि पेश गरिएको प्रस्ताव निवन्ध जस्तो भएको टिप्पणी गर्दै उहाँले सांसदहरुलाई अर्थमन्त्री खतिवडाले हेपेको आरोप लगाए।  “नयाँ बजेट बनाउँदा अहिलेको अवस्थाका बारेमा केही न केही तथ्यांकहरु प्रस्तुत गर्नुपर्दछ र त्यसका आधारमा सैद्धान्तीक छलफल गर्नु पर्ने हो, तर उहाँले सांसदहरुलाई केही थाहा छैन भन्ने ठानेर निवन्धजस्तो लेख्नु भएको छ,” उनले भने। अर्थमन्त्रीको यो प्रस्तुतीले जति निराश बनाएको छ, उत्तिकै निराश उनले सार्वजनिक रुपमा दिने अभिव्यक्तिले पनि बनाउने गरेको नेता थापाको भनाई छ।

समकालिन विद्धानहरु मध्ये सर्वाधिक विद्धवान र अनुभवी भनिएका अर्थमन्त्रीले पनि आशा जगाउन र नयाँ नयाँ योजनाहरु ल्याउन नसकेको भन्दै उनले चिन्ता व्यक्त गरे।

नयाँ