'सयभन्दा बढी नेपालीको शव विदेशमै अन्त्येष्टि गर्ने अनुमतिले भावना माथि ठेस'

प्रकाशित २०७७ वैशाख ३० मंगलबार

काठमाडौं। नेपाली कांग्रेसकी केन्द्रिय सदस्य तथा सांसद डा. डिला संग्रौलाले स्वदेश फर्कन पर्खी रहेका दशौँ हजार नेपालीहरुलाई खाडी लगायतका मुलुकबाट सरकारले विशेष विमान पठाएर उद्दार गर्न आग्रह गरेकी छन् ।

मंगलबार प्रतिनिधिसभा बैठकमा सांसद संग्रौलाले भनिन् ,'आफ्नो रोजगारी गुमाएका दशौँ हजार नेपालीहरु खाडी लगायतका मुलुकबाट स्वदेश फर्कन पर्खी रहेका छन्। उनीहरुलाई विशेष विमान पठाएर सरकारले जति सक्दो चांडो उद्धार गरोस् । त्यस्तै नेपाल, भारत सीमामा आइपुगेका, गत केही दिन देखि भोकै, प्यासै रहेका नेपालीहरुलाई सैयौं नेपालीहरुलाई ससम्मान स्वदेश भित्राएर नेपाल प्रहरी, सेना र स्वयम्सेवक हरु परिचालन गरि होटेल, स्कुल, कलेजहरुमा क्वारेंटाइनमा राख्ने प्रवन्ध गर्न र स्वास्थ्य परिक्षण पछि मात्रै घर, परिवारमा जान दिन माग गर्दछु ।'

'सम्माननीय सभामुख महोदय , अहिले कोरोना संकट भन्दा पहिले नै दुखद निधन भएका एकसय भन्दा बढी नेपालीहरुका शव विदेशमा अलपत्र छन । उनीहरुका परिवार, आफन्त “कि सास देउ, कि लास देउ” भनेर पर्खि रहेका छन् । उल्टै नेपाल सरकारले शव विदशेमै अन्त्येष्टि गर्ने अनुमति दिन परिवारलाई रु पचास हजार राहत दिने भनेको छ, जसले उनीहरुको भावना माथि ठेस पुगेको छ ।'

नेपाल फिर्न चाहने प्रवासी नेपालीहरुलाई स्वदेश फिर्ता ल्याउने काममा सम्बन्धित मुलुकमा रहेका नेपाली दूतावासहरु, गैर आवासीय नेपाली संघका च्याप्टरहरु , अन्य सामाजिक संस्था हरु र मध्य पूर्वमा रहेको श्रमिक संजालसंग सहकार्य गर्न पनि सांसद संग्रौलाले आग्रह गरेकी छन् ।