अन्तर्राष्ट्रिय नेपाली कलाकार समाजद्धारा सरकारलाई स्वास्थ्य सामग्री 

प्रकाशित मिति : २०७७ जेठ ७ बुधबार

काठमाडौं । अन्तर्राष्ट्रिय नेपाली कलाकार समाज (इनास) ले सरकारलाई रु २ लाख बराबरको स्वास्थ्य सामग्री प्रदान गरेको छ । मन्त्रालय पुगेको इनास टोलीले स्वास्थ्य तथा जनसंख्या राज्यमन्त्री नवराज रावतमार्फत सामग्री प्रदान गरेको हो । 

सरकारलाई प्रदान गरेको सामग्रीहरुमा एन–९५ मास्क १०० थान, थर्मल गन १० थान, पिपिइ सेट ५० थान र सर्जिकल मास्क २ हजार थान छन् । 

टोलीमा सहभागी इनास ग्लोवल उपाध्यक्ष भगवती बस्नेतले महामारीका बेलामा सामग्री अभावका कारण काम गर्न नसकिरहेका स्वास्थ्यकर्मीहरुलाई यस्ता सामग्रीहरुले थोरै भए पनि राहत दिने बताए । 

ग्लोबल कोषाध्यक्ष कुलराज थापाले यसलाई भावनात्मक सहयोगको संज्ञा दिए । यस्ता पहलले सबैको मनोबल उच्च राख्न सघाउने उनको भनाइ छ । 

नेपाल च्याप्टरका संयोजक दयाराम पाण्डेले सरकारलाई थोरै भएपनि सहयोग पुगोस् भन्ने उद्देश्य रहेको उल्लेख गरे । टोलीमा इनासका ग्लोबल सल्लाहकार प्रदीप बमजन, इनास नेपाल च्याप्टरका सदस्य कल्पना आचार्यको पनि सहभागिता थियो । 

नेपाली कलाकारहरुको हकहित स्थापित गर्ने र नेपाली कला र संस्कृतिलाई विश्व समुदायमा पुर्याउने उद्देश्यले स्थापना भएको अन्तर्राष्ट्रिय नेपाली कलाकार समाज (इनास) ७४ वटा देशमा संगठित रहेको इनास एशिया संयोजक लोकराज अधिकारीले जानकारी दिए । 

यस संस्थाले विभिन्न विपद र संकटका बेला सामाजिक काम समेत गर्दै आएको छ ।

नयाँ