- सुन चाँदी दर
- विनिमय दर
- नेपाली पात्रो
- राशिफल
काठमाडौं । विश्वभर कोरोना भाइरसबाट संक्रमित हुनेको संख्या बिहीबार बिहानसम्म ५० लाख ८२ हजार ६६० पुगेको छ । एकैदिन एक लाख नयाँ संक्रमित थपिएका छन् ।
मृतकको संख्या अहिलेसम्म ३ लाख २९ हजार २९४ पुगेको छ । २४ घण्टामा ४ जार ७४० जना नयाँ मृतक थपिएका छन् ।
निको हुनेको संख्या २० लाख २० हजार १५७ जना मात्रै रहेको छ ।
२१५ देश तथा प्रशासित क्षेत्रहरुमा फैलिएको कोरोनाबाट सबैभन्दा बढी प्रभावित अमेरिकामा संक्रमितको संख्या १५ लाख ९१ हजार ९९१ पुगेको छ । ९४ हजार ९९४ जनाको ज्यान गएको छ ।
दोस्रो स्थानको रुसमा ३ लाख ८ हजार ७०५ जना संक्रमित हुँदा मृतकको संख्या २ हजार ९७२ पुगेको छ ।
तेस्रो स्थानको ब्राजिलमा संक्रमित २ लाख ९३ हजार ३५७ जना संक्रमित हुँदा मृतकको संख्या १८ हजार ८९४ जना पुगेका छन् ।
युरोपेली देशहरु शान्त हुँदै गर्दा रुस र ब्राजिल भने पछिल्लो पटक निकै तीव्र गतिमा अगाडि आएका छन् ।
ब्राजिलमा २४ घण्टामा सबैभन्दा बढी २१ हजार ४७२ जना नयाँ संक्रमित थपिए । जुन अमेरिकाको भन्दा पनि बढी हो ।
पहिलो पटक अमेरिकालाई कुनै देशले २४ घण्टामा संक्रमित बढी थपिएर देखाइदिएको छ पछिल्लो दुई महिनाको अवधिमा ।
अमेरिकामा २४ घण्टामा २१ हजार ४०८ जना संक्रमित थपिएका थिए । मृतकमा ब्राजिल २४ घण्टामा दोस्रो स्थानमा आइपुगेको छ । ९११ जना नयाँ मृतक थपिएका छन् ।
मृतकको संख्या ब्राजिलमा १८ हजार ८९४ जना पुगेको छ । ब्राजिलले केही दिनमै दोस्रो स्थानको रुसलाई पनि उछिन्ने देखिएको छ ।
ब्राजिल बिगत दुई हप्तादेखि निकै आक्रामक रुपले अगाडि आएको हो । त्यस्तै रुस दोस्रो स्थानमै छ । रुस पनि पछिल्लो दुई हप्तामा आक्रामक भएर आएको हो ।
रुसमा संक्रमित ३ लाख ८ हजार ७०५ पुगेका छन् । नयाँ संक्रमित ८ हजार ७६४ पुगेका छन् । केही दिनसम्म १० हजार भन्दा बढी संक्रमित हुँदै आएकामा २४ घण्टामा केही घटेको छ ।
रुसमा मृतक भने निकै कम छन् । मात्र २ हजार ९७२ जनाको ज्यान गएको छ । जबकि निको हुनेको संख्या पनि कम नै छ । त्यहाँ मात्र ८५ हजार ३९२ जनालाई मात्र निको भएको छ ।
बेलायतले भने अचम्मैसंग सुधार गरेको छ । २४ घण्टामा बेलायतमा एक जना पनि नयाँ संक्रमित थपिएनन् । पाँचौं स्थानको बेलायतमा संक्रमित २ लाख ४८ हजार २९३ जना रहेका छन् ।
त्यस्तै मृत्युमा दोस्रो स्थानमा रहेको बेलायतमा मृतक ३५ हजार ७०४ पुगेका छन् । नयाँ संक्रमित नथपिए पनि नयाँ मृतक भने ३६३ जना थपिएका छन् ।
कोरोनाको उद्गमस्थल चीनमा समेत नयाँ संक्रमित ७ जना थपिएका छन् । जबकि चीनले एक महिनाअघि देखि नै कोरोना नियन्त्रणमा आइसकेको दावी गरेको थियो ।