कार्यपालिका वैठकमै वडा अध्यक्षलाई कुटे रोल्पाको सुनीलस्मृति गाउँपालिका अध्यक्ष गुणेन्द्र घर्तीले

काँग्रेसबाट निर्वाचित वडाध्यक्षलाई कार्यपालिकाको बैठकमै कुटेपछि कांग्रेस आक्रोसित, कार्वाही गर्न माग

प्रकाशित मिति : २०७७ जेठ १० शनिबार
सुनीलस्मृति गाउँपालिकाका अध्यक्ष गुणेन्द्र घर्ती

रोल्पा। तत्कालिन माओवादीबाट निर्वाचित गाउँपालिका अध्यक्षले काँग्रेसबाट निर्वाचित वडाध्यक्षलाई कार्यपालिकाको बैठकमै कुटेका छन् ।

रोल्पाको, सुनीलस्मृति गाउँपालिकाका अध्यक्ष गुणेन्द्र घर्तीले सोही गाउँपालिकाको ४ नम्वर वडाध्यक्ष गञ्जबहादुर क्षेत्रीलाई कार्यपालिकाको बैठक भइरहेकै स्थानमै कुटेका हुन ।

कोरोना भाइरस रोकथाम तथा नियन्त्रण लागि जेठ ९ गते बसेको कार्यपालिका बैठकमा अध्यक्ष घर्तीले वडाध्यक्ष क्षेत्रीलाई कुटपिट गरेका हुन् । वडाध्यक्ष क्षेत्रीले आफ्नो वडामा रहेका बैंकहरुलाई सोमबार र बिहिबार खोल्ने निर्णय वडाबाट गराएका थिए ।

तर, कार्यपालिकाको बैठकमा वडाको कुनै पनि निर्णय आफुलाई अमान्य हुने भन्दै गाँउपालिका अध्यक्ष घर्तीले अनावश्यक विवाद झिकेर आफुमाथि कुटपिट गरेको वडा अध्यक्ष क्षेत्रीले बताए ।

कार्यपालिकाका एक सदस्यले गाउँपालिका अध्यक्ष घर्तीले दादागिरी शैलिमा अपशब्द प्रयोग गरी हातपात गरेको बताए । कुपीटबाट वडाध्यक्ष क्षेत्रीको शरिरका विभिन्न ठाउँमा चोटपटक लागेको छ।

नेपाली काँग्रेस रोल्पाले विज्ञप्ति निकालेर गाउँपालिका अध्यक्ष घर्तीको कार्यलाई आपराधिक गतिविधि भनेको छ। स्थानीय सरकारको प्रमुख जिम्मेवारी पदमा रहेको गाउँपालिका अध्यक्षले सबैलाई समेटेर जाने र विवाद भएका मिलाउँदै जानुपर्नेमा आफ्नो निर्णयलाई लाद्न खाज्ने र हातपात नै गर्ने कार्य कानुन विपरित भएको नेपाली काँग्रेस रोल्पाका सभापति अमरसिंह पुनमगरले बताएका छन्। आपराधिक गतिविधि गर्ने अध्यक्षले लोकतान्त्रीक गणतन्त्रका धज्जी उडाएको सभापति पुनद्वारा हस्ताक्षरित विज्ञप्तिमा भनिएको छ ।

कार्यपालिका बैठक जस्तो गरिमामय ठाउँमा गाउँपालिकाको अध्यक्ष जस्तो जिम्मेवार व्यक्तिले कानुनलाई आफ्नो हातमा लिने हर्कत गरेकोमा आपत्ती जनाउँदै कांग्रेस रोल्पाले कानुन बमोजिम हदैसम्मको कारवाही गर्न स्थानीय प्रशासन र सरकारसँग माग गरेको छ।  

गाउँपालिका र नेकपाले भने अहिलेसम्म कुनै पनि प्रतिक्रिया दिएको छैन् । घर्ती तत्कालिन माओवादी केन्द्रबाट गाउँपालिका अध्यक्ष निर्वाचित भएका हुन् ।

नयाँ