क्यानाडा कोरोनाबाट ग्रस्त अमेरिकापछिको दोस्रो उत्तर अमेरिकी राष्ट्र, नेपाली पनि प्रभावित
प्रकाशित २०७७ जेठ १९ सोमबार
751
Shares
काठमाडौं । कोरोना भाइरसले विश्वका २१३ देश र प्रशासित क्षेत्रहरुलाई प्रभावित पारिरहँदा त्यसबाट क्यानाडा पनि अछुतो छैन ।
क्यानाडा उत्तर अमेरिकी महादेशका राष्ट्रहरुमा दोस्रो स्थानमा प्रभावित राष्ट्र हो । पहिलो प्रभावित अमेरिका विश्वमै अगाडि छ । विश्वमा भने क्यानाडा १४ औं स्थानमा छ ।
दोस्रो स्थानको क्यानाडामा ९० हजार ९४७ जना कोरोना संक्रमित छन् । आइतबार मात्रै ७५७ जना नयाँ संक्रमित थपिएका छन् ।
त्यस्तै मृतकको संख्या ७ हजार २९५ पुगेको छ । २४ घण्टामै सबैभन्दा बढी २२२ जनाको ज्यान गयो ।
क्यानाडामा लकडाउन खुकुलो पार्ना साथ संक्रमित बढेका छन् ।
नेपालीहरु पनि संक्रमित
क्यानाडामा हजारौंको संख्यामा नेपाली परिवार बसेको छ । उनीहरु पनि प्रभावित भएका छन् ।
अहिलेसम्म २४ जना कोरोना संक्रमित रहेको गैरआवासीय नेपाली संघ (एनआरएनए) का स्वास्थ्य समिति संयोजक डा सञ्जीव सापकोटाले बताएका छन् ।
विश्वमा रहेका नेपालीहरुमध्ये अहिलेसम्म १३० नेपालीको ज्यान गएको छ भने १६ हजारको हाराहारीमा संक्रमित रहेका छन् ।
क्यानाडामा थुप्रै क्यानेडेली र अन्य विदेशीको ज्यान जाँदा त्यसमा नेपाली नपर्नु नै ठूलो कुरा रहेको छ ।
तर लकडाउन खुकुलो हुँदा भने त्यसले जोखिम बढेको छ । क्यानाडामा पनि प्रभावित नेपालीहरुलाई राहत वितरणमा एनआरएनए सक्रिय रहेको बताइएको छ ।
