हरियो तरकारीमा कोरोना सर्छ भन्दै बन्दुक देखाएर फालिदियो जिल्ला प्रहरी कार्यालयले  

भारतबाट खुरुखुरु तरकारी ल्याउन दिने तर नेपाली उत्पादनलाई निरुत्साहित पार्न खोज्नु प्रशासनको गैरजिम्मेवारीको हद

नारायण वली,  प्रकाशित मिति : २०७७ जेठ १९ सोमबार

रुपन्देही । हरियो तरकारीमा कोरोना भाइरस सर्छ भन्दै बन्दुक देखाएर उक्त तरकारी बीच बाटोमै फालिएको छ । 

अहिले नेपालमा कोरोना भाइरसको संक्रमणले चरम रुप लिँदै गर्दा एक जिल्लाबाट अर्को जिल्लामा सामग्रीहरु पठाउँदा कोरोनाको त्रासका नाममा बेथिति पनि मच्चिदै गएको छ । 

यस्तै भएको छ अर्घाखाँचीमा पनि । लकडाउनका कारण तरकारी अभाव भएपछि कपिलवस्तुबाट लगिएको तरकारी बन्दुक देखाएर बाटोमै फालिएको छ । 

हरियो तरकारीमा कोरोना भाइरस सर्छ भन्ने डर देखाएर तरकारी बीच बाटोमै फालिएको हो । अर्घाखाँचीमा तरकारीजन्य वस्तुको अभाव भएपछि एक व्यापारीले कपिलवस्तुबाट लगेको तरकारी आइतबार बन्दुक देखाएर बीच बाटोमै फालिएको हो । 

प्रदेश नं ५ अन्तर्गत तराईका जिल्लाहरुमध्ये कपिलवस्तु पनि कोरोनाको हटस्पट हो । त्यहाँको हरियो तरकारी जिल्ला आउँदा कोरोना भाइरस सर्ने भन्दै उक्त तरकारी नष्ट गरिएको जिल्ला प्रहरी कार्यालय अर्घाखाँचीले जनाएको छ ।

तर भारतबाट सहजै रुपमा कृषिजन्य वस्तुहरु नेपाल आइरहेका बेला स्थानिय स्तरमा उत्पादन गरेको कृषिजन्य वस्तुलाई नेपाल भित्रै आपुर्ति गर्दा प्रहरीले बन्दुक देखाएर तरकारी नष्ट गर्नुलाई भने निकै गम्भीर पूर्वक हेर्न थालिएको छ । 

यसरी नेपाली उत्पादनलाई बजार ब्यवस्थापन गर्नुको सट्टा किसानलाई निरुत्साहित पार्ने काम भएको कपिलवस्तुबाट निर्वाचित प्रदेश नं ५ का प्रदेश सभा सदस्य विष्णु पन्थीले टिप्पणी गरेका छन् ।

साथै उनले समाजवादका कुरा गर्ने हाम्रो समाज, राजनितिक नेतृत्व, नीति निर्माता र प्रशासनको यो हदको गैर जिम्मेवारीपन कहिलेसम्म भनी आक्रोश पोख्दै यसले एक प्रकारको द्धन्द्ध निम्त्याउन सक्ने बताएका छन् ।

नयाँ