इस्लामावाद। पाकिस्तानले अफगानिस्तान सरकार र तालिवानसँगको वार्ताका लागि बैठकको आयोजना गरेको छ ।
पाकिस्तानले यसअघि अवरुद्ध हुन पुगेको भनिएको सो शान्तिवार्ताको पुनःस्थापनाका लागि पहलस्वरूप चार देशको बैठक आयोजना गरेको हो ।
सो प्रयोजनका लागि पाकिस्तानले अफगानिस्तान, संयुक्त राज्य अमेरिका, चीन र पाकिस्तानबीच सो बैठकको आयोजना गरेको हो ।
अफगानिस्तानको सरकारले हालैमात्र अफगानिस्तानको तालिवानसँग सम्बन्धित रहेको आशङ्का गरिएका चार वटा विभिन्न लडाकूलाई झुण्डाइएको केही दिनपछि यो बैठकको आयोजना भएको छ ।
यो चार देशको समूह गएको जनवरीमा गठन गरिएको थियो । उक्त समूहले अफगानिस्तानमा रहेका तालिवान विद्रोही र सरकारका बीचमा प्रत्यक्ष शान्तिवार्ता गराउने उद्देश्य राखेको छ ।
यी चारै देशको बैठक बुधबार पाकिस्तानी राजधानी सहर इस्लामावादमा भएको थियो । सो बैठकका क्रममा पाकिस्तानी पक्षले वार्ताका लागि पहल गर्न आग्रह गरेको थियो ।
चारै देशका उच्च कूटनीतिज्ञहरूको सहभागिता रहेको सो बैठकमा आगामी केही समयमै यी दुवै पक्षबीचको वार्ताका लागि पहल गरिने प्रतिबद्धता व्यक्त भएको थियो । एपी
