नेपालगन्ज । बाँके जिल्लाको राप्तीसोनारी गाउँपालिका नेपालकै सबैभन्दा ठूलो गाउँपालिका हो । प्राकृतिक श्रोत र साधनले भरिभराउ तथा निकै सम्भावना बोकेको राप्तीसोनारी गाउँपालिकाको समग्र विकास, योजना र कार्यक्रमका विषयमा गाउँपालिकाका  प्रमुख प्रशासकीय अधिकृत दल बहादुर बस्नेतले हाम्राकुरासँग कुरा गरेका छन् । प्रस्तुत छ सोहि कुराकानीको सम्पादित अंशः

राप्तीसोनारी गाउँपालिकाले अहिले कस्ता योजनालाई प्राथमिकतामा राखेर काम गरिरहेको छ ?

गाउँपालिकाले अहिले पुर्वाधार, शिक्षा, स्वास्थ्य, कृषि, विद्युतजस्ता योजना तथा कार्यक्रम प्राथमिकतामा राखेर काम गरिरहेको छ । यस्ता योजनाहरुले राप्तीसोनारी गाउँपालिका समृद्ध बन्नेछ।

जनअपेक्षा कत्तिको पुरा हुन सकेको छ ?

जनअपेक्षा धेरै नै छ । त्यसैले सबै जनअपेक्षालाई एकैचोटी एकै समयमा पूरा गर्न त नसकिएला तथापि अधिकतमरुपमा नागरिकलाई सन्तुष्टि दिन हर प्रयास गरिरहेका छौं ।

जनताका आकांक्षा धेरै छन्, योजना पनि त्यही किसिमले माग भइराखेको हुन्छ, गाउँपालिकाको सिमित बजेटमा कसरी व्यवस्थापन गरिराख्नुभएको छ ?

हामीकहाँ जनताबाटै योजना तथा कार्यक्रमहरुको माग हुने र त्यसलाई बजेट मार्फत सम्बोधन गर्ने परिपाटी भएकाले एकैसाथ धेरै योजना तथा कार्यक्रमहरुको माग भएको हुन्छ । त्यसलाई विकासको राष्ट्रिय लक्ष्य, उद्देश्य तथा नीति कार्यक्रम, योजना कार्यक्रमको आवश्यकता, लाभ हानी विष्लेषण गरेर  प्राथमिकीकरण गरी जनताका आकांक्षालाई सम्बोधन गर्ने गरिएको छ ।

पहुँच र चिनजानका आधारमा काम गरिन्छ भन्ने जनगुनासो पनि छ नी ?

पहुँच र चिनजानका आधारमा काम हुन्छ भन्ने कुरा सरासर गलत हो । त्यस्तो कदापि भएको छैन र हुन पनि सक्दैन । राज्यले सबै नागरिक बराबर भनिसकेपछि कसैलाई काखापाखा गर्न मिल्दैन । गाउँपालिकाबासी सबैलाई हामीबाट समान व्यवहार हुन्छ । त्यस्मा कुनै भेदभाव हुँदैन ।

जिल्लाकै सबैभन्दा सम्भावना बोकेको गाउँपालिकाको आन्तरिक आयको अवस्था कस्तो छ ?

यस गाउँपालिकामा रहेको राप्ती नदी तथा अन्य खोला नालाहरु, बाँके राष्ट्रिय निकुञ्ज, प्रचुर प्राकृतिक श्रोतहरु, कृषियोग्य भूमि र बिस्तारै बढ्दै गएका स-साना बजार केन्द्रहरुको कारण र क्षेत्रफलको आधारमा पनि बाँके जिल्लाको आधा भाग ओगटेकोले राप्तीसोनारी गाउँपालिका सम्भावनायुक्त स्थानीय तह हो ।

नदीजन्य पदार्थबाट कत्तिको राजश्व उठिरहेको छ ?

गत आर्थिक बर्ष ०७६/०७७ मा ४ पटक ठेक्का खुल्दा समेत विभिन्न कारणले ठेक्का लाग्न नसकेकोले लक्ष्य अनुरुप राजश्व उठ्न सकेन । यस आर्थिक बर्षमा नदीजन्य पदार्थबाट २० करोड भन्दा बढी राजश्व उठाउने लक्ष्यका साथ अगाडि बढेका छौं । यसको लागि हालै बोलपत्र समेत आह्वान भइसकेको छ।

नदी दोहनका कुरा पनि बेला बेला आउँछन्, राजश्व छली पनि भइराखेको कुरा आइरहेको छ । यसमा गाउँपालिकाले कस्तो भूमिका निभाइरहेको छ ?

नदीजन्य पदार्थ उत्खनन भनेकै प्राकृतिक श्रोतको दोहन नै हो । तथापि यसको पनि सीमा हुन्छ । वातावरणीय अध्ययन प्रतिबेदन प्रतिकूल नहुने गरी नियम कानुनको दायरामा बसेर उत्खननको काम हुन्छ । एकाध चोरीका घटना पनि देखिन्छन्, त्यसमा गाउँपालिकाको आफ्नै सुरक्षा संयन्त्र नहुने भएकाले नेपाल प्रहरी र सशस्त्र प्रहरीको सहयोग लिएर नियन्त्रणमा लिई जरिवाना गर्ने गरिएको छ । यसमा यहाँहरु जस्ता संचार जगतको पनि सहयोग चाहिन्छ । नजिकको सरकार स्थानीय तह भएपनि तीनै तहका सरकारको आपसी सहयोगमा नदीजन्य श्रोतको संरक्षण र ब्यबस्थापन भएको छ।

कोरोना कहरले सबैतिर गाँजेको अवस्था छ । गाउँपालिकामा कस्तो प्रभाव परेको छ ?

कोरोना कहरले अन्य क्षेत्र जस्तै यो क्षेत्र पनि ग्रसित थियो र अहिले पनि छ । राहत वितरण, क्वारेन्टाइन र आइसोलेसन ब्यबस्थापन लगायत अनपेक्षित काम गर्नुपरेको र यसले विकासका अन्य गतिविधिलाई समेत प्रभावित पारेकोमा हाल  कोरोनासंगै अगाडि बढ्ने परिस्थिति बन्दैछ।

कोभिड महामारीकै बीच चालू आर्थिक बर्षको बजेट आएको छ । कोरोनाले सबैतिर प्रभाव पारेको छ । ठूलो संख्यामा मानिसहरु बेरोजगार भएका छन् । भारत लगायत बाहिरी देशबाट मानिसहरु फर्केका छन् । अब उनीहरुलाई समेट्ने गरी कसरी अगाडि बढ्ने सोच छ ?

कोरोनाले अन्य रोजगारीको क्षेत्रमा असर परेको भएतापनि कृषि क्षेत्रमा चाहिँ नयाँ अवसर पनि ल्याएको छ । यहाँको मुख्य उत्पादन र रोजगारीको क्षेत्र भनेको कृषि नै हो । त्यसैले अन्य क्षेत्रको रोजगारी गुमाएका वा बिदेशबाट फर्केका युवाहरूलाई लक्षित गरि कृषि, पशुपालन, स्थानीय परम्परागत उत्पादनका क्षेत्रमा परिचालन गरेर बेरोजगार न्यूनीकरण गर्ने सोच छ । यसको लागि कृषिमा सुपरजोन कार्यक्रम, अनुदानका कार्यक्रमहरु, स्थानीय उत्पादन बढोत्तरी गर्ने कार्यक्रमहरु कार्यान्वयन गरेर विद्यमान समस्याको समाधान गरिनेछ । अघिल्लो आर्थिक बर्षमा समेत कोरोनाका कारण स्वदेश फर्किएका युवाहरुको लागि स्वरोजगारमुलक कार्यक्रम संचालन भएको थियो । यस बर्ष त्यसलाई अझै भब्यरुपमा अगाडि बढाइनेछ ।

जनप्रतिनिधि र कर्मचारी बीचको समन्वय कस्तो छ ?

समग्र नेपालमा जनप्रतिनिधि र कर्मचारी बीचको सम्बन्धमा त्यति न्यानोपन नभएको जस्तो बुझिन्छ । बेलाबखतमा द्वन्दका घटनाहरु पनि तपाईं हामीले देखे सुनेकै हो । तथापि यस गाउँपालिकामा हालसम्म सब ठिकठाक चलिरहेको छ । जनप्रतिनिधि र कर्मचारी मिलेर अगाडि बढिरहेका छौं ।

अन्त्यमा जनप्रतिनिधि, कर्मचारी र गाउँपालिकाबासीलाई के भन्न चाहनुहुन्छ ?

राप्तीसोनारी गाउँपालिका बहुत सम्भावनायुक्त गाउँपालिका हो । निकुञ्ज, राप्ती नदी लगायतका अन्य नदीनाला र कृषियोग्य भूमिका अलावा राष्ट्रिय गौरवको सिक्टा सिंचाई आयोजना समेत यहीँ छ । तसर्थ यिनको सदुपयोग गरेर पर्यटन, कृषि र निर्माण सामग्री उत्पादनको हबकोरुपमा यस गाउँपालिकालाई अगाडि बढाउन सकेमा समृद्ध राप्तीसोनारीको गन्तव्यमा पुग्न सकिन्छ । विकासको शास्त्रले पनि जहाँ जे छ त्यसको सदुपयोग गर भन्छ ।

यिनै ३ वटा क्षेत्र अगाडी बढाउन म यहाँका जनप्रतिनिधि र गाउँपालिकाबासीलाई अनुरोध गर्न चाहन्छु । गाउँपालिकाले प्रदान गर्ने सेवा सुबिधामा कुनै गुनासो भएमा तत्काल जानकारी गराई सुधारको मौका दिन आम गाउँपालिकाबासीमा अनुरोध गर्छु।