काबुल । अफगानिस्तानको सशस्त्र विद्रोही संगठन तालिवानका प्रमुख नेता मुल्लाह अख्तर मन्सुरमा मारिएपछि सो संगठनले नयाँ प्रमुख नियुक्त गरेको समाचार छ ।
उक्त संगठनले बुधबारै नेता मुल्लाहको निधनको पुष्टि गरेको थियो । उक्त समाचारको तालिवान संगठनले पुष्टि गरेसँगै उनको स्थानमा नयाँ नेता पनि नियुक्त गरिएको समाचारमा जनाइएको छ ।
मौलाबि हैबतुल्लाह अखुन्जादालाई सो आतङ्ककारी संगठनको नयाँ नेताका रुपमा चयन गरिएको समाचार सो संगठनले दिएको छ ।
अफगानस्तिानमा विगतका वर्षहरुदेखि सशस्त्र विद्रोह र हिंसा मच्चाइरहेको सो संगठनका मुख्य नेताको मृत्युको समाचार केही दिनयतादेखि विभिन्न सञ्चारमाध्यममा आएको थियो ।
सो समाचारको बुधबार तालिवानले पुष्टि गरेका हुन् । उनीहरुले आफ्नो वेभसाइटमा सो समाचारको आधिकारिकता पुष्टि गर्ने सामग्रीहरु राखेका छन् ।
अमेरिकी सेनाको हवाई कारबाहीका क्रममा ती मुल्लाह पाकिस्तानमा मारिएका हुन् । उनको हत्याको समाचार सबैभन्दा पहिला अमेरिकी सेनाले दिएको थियो ।
इस्लामिक इमिरेट्स अफ अफगानिस्तानको बुधबार बसेको लिडरसिप काउन्सिलको बैठकले उनलाई चयन गरेको समाचारमा जनाइएको छ ।
उक्त काउन्सिलले गरेको निर्णयमा नयाँ नेता विवादरहित रुपमा नियुक्त गरिएको जनाइएको छ । नयाँ नेताको बारेमा कुनै परिचय भने उक्त समाचारमा दिइएको छैन ।
अमेरिकी राष्ट्रपति बाराक ओबामाले मुल्लाहको मृत्यु अफगानिस्तानमा शान्ति स्थापनाका लागि एक महत्वपूर्ण उपलब्धि भएको टिप्पणी गर्नुभएको थियो ।
नयाँ नेता अखुन्जादाले तालिवानको उपप्रमुखको रुपमा रही काम गरेका थिए । उनी तालिवानहरुको सो काउन्सिलको सदस्य समेत रहेका थिए । एएफपी
