डोटी । सामाजिक सेवा दिवसको अवसरमा एकल महिलाहरुलाई स्वास्थ सामग्री वितरण गरिएको छ । बिहीबार ४१ औँ सामाजिक सेवा दिवसको अवसरमा दिपायल सिलगढी नगरपालिका – ३ का एकल महिलाहरूलाई स्वास्थ सामग्री वितरण गरेको हो ।
वितरण कार्यक्रममा बोल्दै दिपायल सिलगढी नगरपालिका –३ वडाध्यक्ष चक्र माझीले गैरसरकारी संस्थाहरुले सामाजिक सेवाका क्षेत्रमा महत्त्वपूर्ण काम गरेको बताए । अध्यक्ष माझीले भने, ‘स्थानीय र नागरिक संस्था मिलेर जानु पर्नेमा जोड दिए ।’
वितरण कार्यक्रममा बोल्दै गैरसरकारी संस्था महासंघ डोटी शाखाका अध्यक्ष रघुबहादुर कठायतले थोरै भए पनि राहत हुने बताए ।
उनले भने, ‘समाज सेवामा नागरिकहरूको आकर्षण अनि नयाँ पुस्तालाई समाज सेवाप्रति अभिप्रेरित गर्नका लागि दिवसको महत्त्व रहेको छ ।’
दिसिनपा – ३मा रहेका दुई दर्जन भन्दा बढी महिलाइहरुलाई साबुन, सर्जिकल माक्स लगायतका स्वास्थ सामग्री वितरण गरेको अध्यक्ष कठायतले बताए ।
कार्यक्रममा बोल्दै सामुदायिक विकास केन्द्र डोटीका अध्यक्ष हेमराज जोशीले सामाजिक सेवामा गैरसरकारी संस्थाहरुले उदाहरणि कार्य गरेको बताए ।
गैरसरकारी संस्था महासंघ डोटीको आयोजना तथा सामुदायिक बिकास केन्द्र डोटी, गुड नेभर ईन्टरनेशनल र सम बिकास केन्द्र डोटीको आर्थिक सहयोगमा वितरण गरिएको जनाएको छ।
२०३४ साल असोज ६ मा समाजकल्याण परिषद्को स्थापना भएको दिनको अवसर पारेर यो दिवस मनाइँदै आएको हो । ‘सेवा नै धर्म हो, मन वचन र कर्मले सेवा गरौँ’ भन्ने उद्देश्यले परिषद्को स्थापना भएको थियो ।
समाज सेवामा नागरिकको आकर्षण अनि नयाँ पुस्तालाई समाज सेवाप्रति अभिप्रेरित गर्नका लागि समाज कल्याण परिषदले समाज सेवा दिवस मनाउन शुरु गरेको हो ।
यस वर्षको सामाजिक सेवा दिवसको नारा ‘सामाजिक क्षेत्रः राष्ट्रिय गौरव आजको आवश्यकता, समृद्धि र सुखको लागि सामाजिक रुपान्तरण र उद्यमशीलता’ भन्ने रहेको छ ।
जिल्लामा विभिन्न कार्यक्रम गरि दिवस सप्ताहव्यापी रूपमा मनाइँदै छ।
