काठमाडौं । जनता समाजवादी पार्टीका प्रदेश २का बहुमत सांसदहरु प्रदेश २का मुख्यमन्त्री लालबाबु राउतलाई तत्काल फेर्नुपर्ने पक्षमा एक ठाउँमा उभिएका छन् । उनीहरुले आफनै सरकारको चर्को आलोचना गरेका छन् । तत्काल प्रदेश २ सरकारको नेतृत्व नफेरे पार्टीलाई ठूलो घाटा हुने सन्देश पार्टी अध्यक्ष उपेन्द्र यादवसमक्ष समेत राखेका छन् ।

जसपाका केन्द्रीय अध्यक्ष यादव जनकपुर गएको बेला बिहीबार साँझ उनले प्रदेश २का सांसदहरुसँग संयुक्त बैठक गरेका थिए। उक्त बैठकमा बोल्दै बहुमत सांसदहरुले प्रदेश २ सरकारको नेतृत्व फेर्नुपर्ने अडान राखेका थिए । केन्द्रमा तत्कालिन राष्ट्रिय जनता पार्टी र समाजवादी पार्टीवीच एकीकरण भइ जसपा निर्माण भए पनि प्रदेश २मा पूर्व राजपा र पूर्व समाजवादीका संसदीय दल अलग अलग छन् । प्रदेश २मा पूर्व राजपा र पूर्व समाजवादीको संसदीय दल तत्काल समायोजन गरी नेतृत्व फेर्नु पर्ने धारणा प्रदेश २ का धेरैजसो सांसदहरुले राखेका छन् । १ सय ७ सदस्यीय प्रदेश २ सभामा ५५ जना सांसद जसपाका छन् । ती मध्ये ३० जना पूर्व समाजवादी र २५ जना पूर्व राजपाका छन् । नेतृत्व फेर्नु पर्ने पक्षमा पूर्व समाजवादीका सांसदहरु पनि देखिएका छन् ।

यादवले बिहीबार पूर्व राजपा र पूर्व समाजवादीका प्रदेश सभाका सांसदहरुसँग संयुक्त बैठक बोलाएका थिए । बैठकमा बोल्ने बहुमत सांसदहरुले प्रदेश २ सरकारको अहिलेको नेतृत्व पूर्ण रुपमा असफल भएको धारणा राखेका थिए । ‘प्रदेश २का बहुमत सांसदहरु प्रदेश २ सरकारको नेतृत्व अविलम्ब फेर्नु पर्ने पक्षमा उभिएका छन्’ प्रदेश २का सांसद तथा जसपाका कार्यकारिणी समिति सदस्य मनिष सुमनले भने,‘प्रदेश २ सरकारको कार्यशैलीप्रति प्रदेश २का जनता वाक्क छन । प्रदेश २ सरकार पूर्णरुपमा असफल भएको छ ।’  यस्तै धारण प्रदेश २का अर्का सांसद उपेन्द्र महतोको पनि छ । प्रदेश २मा तत्काल जसपाको संसदीय दलको नेता चयन गरी मुख्यमन्त्री फेर्नु पर्ने उनको माग छ ।

प्रदेश २का मुख्यमन्त्री पूर्व समाजवादीका संसदीय दलका नेता हुन् । केन्द्रमा पूर्व समाजवादी र राजपा एक भए पछि प्रदेश २मा पनि दुई पार्टीको संसदीय दल समायोजन गरी नयाँ नेता चयन गर्नु पर्ने पक्षमा धेरैजसो सांसदहरु एक ठाउँमा उभिएका छन् । प्रदेश २का अर्का एक सांसदले भने,‘केन्द्रमा एक/एक वर्षमा मन्त्री फेरिएर नेकपाका सबै सांसदहरुले पालो पाउने । हामीले भने साँढे दुई वर्षसम्म कुर्नुपर्ने ?’

स्रोतका अनुसार यादवले गरेको संयुक्त बैठकमा रमेश पटेल, गौरी नारायण साह, अशोक यादव, रिना यादव, जानकारीशर साह लगायतका सांसदहरुले प्रदेश २ सरकार सम्पूर्ण रुपमा असफल भएको, जनताको भरोसा गुमेको, मन्त्रीहरुले आफना परिवारका सदस्यहरुलाई मात्र हेर्ने गरेको, मन्त्रीहरु भ्रष्ट्राचारमा लिप्त भएको, काम गर्न नसकेको जस्ता आरोप लगाएका थिए । यादवसँगको बैठकमा प्रदेश २ सरकारका मन्त्रीहरुले भने आफूले राम्रो काम गरे पनि त्यसको सन्देश जनतामा जान नसकेको गुनासो पोखका थिए ‘तर सरकार फेर्नु पर्ने पक्षमा बलियो आवाज देखियो’ सुमनले भने । 

आगामि कात्तिक ३ र ४ गते जसपाका कार्यकारिणी समितिको बैठक बस्दै छ । अब उक्त बैठकमा प्रदेश २ सरकारको नेतृत्व फेर्ने या नफेर्ने पक्षमा पनि छलफल हुने पार्टीका नेताहरुले जनाएका छन् । पार्टी अध्यक्ष यादव निकट एक नेताले भने,‘तर पनि पार्टी अध्यक्ष यादव तत्काल प्रदेश २ सरकारको नेतृत्व फेर्नुपर्ने पक्षमा हुनुहुन्न ।’