पाँचथर । दशैँ तिहारमा घरपोत गर्न सिगार्न प्रयोग गरिने रातो माटोले अहिले भाउ पाएपछि पाँचथरको फिदिम नगरपालिका–४ चारखम्बेका स्थानीय उत्साहित बनेका छन् ।
चाडपर्वको मुखमा रातो माटोले राम्रो भाउ पाएपछि त्यस ठाउँका स्थानीय उत्साहित बनेका हुन् । रातो माटो प्रतिबोरा एक सय रुपैयाका दरले बिक्री हुने गरेको छ । यस क्षेत्रको रातो माटो छिमेकी जिल्ला ताप्लेजुङ, तेह्रथुम, इलाम र झापासम्म निर्यात हुने गरेको छ ।
फिदिमको चारखम्बे क्षेत्रबाट वार्षिक दश लाखसम्मको माटो बिक्री हुँदै आएको स्थानीय भीम सिगुले बताए । उनले भने, “माटो दशैँ र तिहारमा बढी बिक्री हुने गरेको छ, माटो बिक्री गरेरै आफूले रु तीन लाख वार्षिक आम्दानी गर्ने गरेको छु ।”
यस ठाउँका अन्य स्थानीयले पनि यही रातो माटो बिक्री गरेर दशैँ तिहारको लागि खर्च जुटाउने गरेको स्थानीय कृष्ण खवासले बताए । सामान लिएर फिदिम आउने तर फर्कदा रित्तो हुने भएपछि ट्याक्टर चालकले गाउँमै लगेर पनि बिक्री गर्ने गरेको उनले बताए ।
यस ठाउँका रातो माटो दशैँ तिहारमा बढी बिक्री हुने गरेको छ । अन्य समयमा पनि फाटफुट बिक्री हुने गरेको स्थानीय अर्जुन खतिवडाले बताए ।
