काठमाडौं।दुई गोलले पछि परेको चेक गणतन्त्रले २ गोल फर्काएपछि क्रोएसिया र चेक गणतन्त्रको खेल बराबरीमा सकिएको छ। खेलको अन्तिम समयमा क्रोएसियाका समर्थकले मैदानमा पटखाहरु पालेपछि खेल केही बेर अवरुद्ध भएको थियो।
पुन: शुरु भएको खेल पछि चेकले ९४औं मिनेटमा गोल गर्दै बराबरी गरेको थियो। खेलअवधिभर पुरै दबदबा क्रोएसियाको भए पनि दर्शकहरुको अभद्दर ब्यवहारका कारणले क्रोएसियाको खेलको लय बिग्रे पछि चेकले बराबरीको मौका पाएको थियो।
खेलको ३७औं मिनेटमा क्रोएसियाका ईभान पेरिसिचले गोल गर्दै क्रोएसियालाई १-०को अग्रता दिलाएका थिए। त्यसैगरि ५९औं मिनेटमा ईभान राकिटीले दोस्रो गोल गरेका थिए।
खेलको ७६औं मिनेटमा चेकका मिलन स्कोडाले गोल गर्दै खेल १-२को स्थितीमा पुर्याएका थिए। दोस्रो हाफको अतिरिक्त समयमा पाएको पेनाल्टीको सदुपयोग गर्दै चेकका टोमस नेसिडले गोल गरेका थिए।
स्पष्ट तीन अंक लिने स्थितीबाट क्रोएसियाले १ अंकमा चित्त बुझाउनु परेको छ भने चेक रिपब्लिकले १ अंक जोड्दा दोस्रो चरणको ढोका खुल्लै राखेको छ।
२ खेलमा ४ अंकका साथ क्रोएसिया अंक तालिकाको पहिलो स्थानमा रहेको छ भने स्पेन १ खेलबाट ३ अंककासाथ दोस्रो स्थानमा रहेको छ। चेकको २ खेलमा १ अमक रहेको छ भने टर्की १ खेलबाट अंकबिहिन रहेको छ।
