म्यानचेष्टर डर्बीमा घरमै हार्यो सिटी, तोडियो रेकर्डको यात्रा
प्रकाशित २०७७ फागुन २४ सोमबार
698
Shares
काठमाडौं । इङ्गलिश प्रिमियर लिग फुटबलमा शीर्ष स्थानको म्यानचेस्टर सिटी घरेलु मैदानमै पराजित भएको छ । यो हारले उसको जितको रेकर्डको यात्रा तोडिएको छ । हारसंगै सिटीको २१ खेलको अपराजित यात्राको रेकर्ड टुंगिएको छ ।
आइतबार राति भएको म्यानचेस्टर डर्बी भिडन्तमा सिटी म्यानचेस्टर युनाइटेडसँग २–० गोल अन्तरले पराजित भएको हो ।
युनाइटेडलाई जित दिलाउन ब्रुनो फर्नान्डेस र लुक शले एक एक गोल गरे । खेलको दोस्रो मिनेटमै युनाइटेडले फर्नान्डेसको पेनाल्टी गोलबाट अग्रता बनाएको थियो ।
५० औं मिनेटमा लुक शले गोल गर्दै युनाइटेडलाई जित दिलाए । यस जितसँगै ओले गुनर सोल्सायर सिटीविरुद्ध तीन अवे खेलमा जित निकाल्ने युनाइटेडका पहिलो प्रशिक्षक बनेका छन् ।
अंक तालिका
आइतबार रातिको जितसँगै म्यानचेस्टर युनाइटेड लिगको दोस्रो स्थानमा उक्लिएको छ । युनाइटेडले २८ खेलमा ५४ अंक जोडेको छ ।
शीर्ष स्थानको म्यानचेस्टर सिटी २८ खेलमा ६५ अंक जोडेर शीर्ष स्थानमा रहेको छ । यो खेल हारे पनि सिटी अझै युनाइटेड भन्दा ११ अंकले अघि रहेको छ ।
लेस्टर सिटी ५३ अंकसहित तेस्रो स्थानमा झरेको छ । एक खेल कम खेलेको चेल्सी ४७ अंकसहित चौथो, २ खेल कम खेलेको एभर्टन ४६ अंकसहित पाँचौं स्थानमा रहेको छ । टोटनह्याम हट्सपर ४५ अंकसहित छैटौं तथा डिफेन्डिङ च्याम्पियन लिभरपुल २८ खेलबाट ४३ अंकसहित आठौं स्थानमा छ ।
