काठमाडौं । स्टार स्ट्राइकर लियोनल मेसीले अर्जेन्टिनालाई कोपा अमेरिका फुटबलको सेमिफाइनलमा पुर्याउन सफल भएका छन् । आइतबार बिहान भएको क्वार्टरफाइनलमा इक्वेडरलाई पराजित गर्दै अर्जेन्टिना सेमिफाइनलमा पुगेको हो ।
ब्रजिलमा जारी प्रतियोगितामा अर्जेन्टिना ३–० गोल अन्तरले विजयी भएको हो । मेस्सीले तीन वटै गोलका लागि भूमिका खेलेसँगै टिमले शानदार जित निकालेको हो ।
अर्जेन्टिनालाई जित दिलाउन मेस्सीसँगै रोड्रिगो डी पल र लौराटो मार्टिनेजले समान एक एक गोल गरे ।
४० औं मिनेटमा रोड्रिगोले पहिलो गोल गरेका थिए । ८४ औं मिनेटमा मार्टिनेजले गोल गर्दै २–० ले अग्रता दिलाए । इन्जुरी समयमा पिएरो हिन्कापीले रातो कार्ड खाएसँगै अन्तिम समयमा इक्वेडर १० खेलाडीमा सीमित भएको थियो ।
त्यसपछि अन्तिम समयमा मेस्सीले गोल गर्दै टिमलाई जिताए । स्पेनिश क्लब बार्सिलोनाबाट रिलिज भएसँगै मेस्सीको खेलमा थप आकर्षण र चमक आएको छ ।
आइतबार बिहानै भएको खेलमा कोलम्बियाले उरुग्वेलाई पेनाल्टी सुटआउटमा पराजित गरेको हो । निर्धारित समयको खेल गोलरहित बराबरीमा सकिएपछि निर्णय पेनाल्टी सुटआउटबाट गरिएको थियो ।
