काठमाडौं । नेपाली कांग्रेसले नेकपा माओवादी केन्द्रसंग भएको सहमति अनुमोदन गरेको छ । संसद भवन नयाँ बानेश्वरमा बसेको पार्टी केन्द्रीय समितिको बैठकले माओवादी केन्द्रसंग भएको सहमति अनुमोदन गरेको हो ।
यस्तै, प्रधानमन्त्री केपी ओलीले राजीनामा दिनु पर्ने र नभए संसदमा अविश्वास प्रस्ताव ल्याउने निर्णय भएको कांग्रेस केन्द्रीय सदस्य रमेश लेखकले जानकारी दिनु भयो ।
बैठकबाट निस्कने क्रममा उनले भने, ‘माओवादी केन्द्रसंग भएको सहमति अनुमोदन भएपछि सरकारमा सघाउने कुराको औपचारिक पुष्टी भएको मान्नु पर्दछ ।’ कांग्रेस सभापति शेरबहादुर देउवाले यसअघि नै माओवादी अध्यक्ष पुष्पकमल दाहालसँग सरकार गठनका बारेमा सहमति गरेकोमा र बुधबारको बैठकले त्यो सहमतिलाई अनुमोदन गरेको हो । बैठकमा सहमतिय सरकार बनाउन समेत पहल गर्नेबारे छलफल भएको बताइएको छ ।
यसैबीच, बैठकले माओवादी केन्द्रलाई समर्थन गरेको पत्र आज नै पठाउने निर्णय गरेको छ । कांग्रेस केन्द्रीय सदस्य विमलेन्द्र निधीले माओवादीसँग भएको ७ बुँदे समझदारी पत्र पढेर सुनाएका थिए ।
सभापति देउवाले ७ बुँदे अनुमोदनको लागि प्रस्ताव गरे । देउवाले अनुमोदन प्रस्ताव गरेपछि नेताद्वय प्रकाशमान सिंह र रामशरण महतले पार्टीमा छलफल नगरेको भन्दै असन्तुष्टि व्यक्त जनाएका थिए ।
नेता निधीले माओवादी केन्द्रसँग सरकार चलाउनेबारे गोप्य लिखित सहमति भएको बताएका थिए । निधीले उक्त सहमति अति गोप्य राखिएको बताएको बैठकमा सहभागि एक नेताले बताएका छन् । निधीले स्थानीय चुनावसम्म पुष्पकमल दाहालले सरकारको नेतृत्व गर्ने र त्यसपछि हुने दुईवटा चुनावमा कांग्रेसले नेतृत्व लिने सहमति भएको सुनाएको ती नेताले हाम्राकुरालाई जानकारी दिए ।
