झापाको अर्जुनधारामा ग्यास लिक भइ आगालागी हुँदा तीन जना घाइते

हाम्रा कुरा

प्रकाशित २०७८ भदौ २६ शनिबार

झापा । झापाको अर्जुनधारमा ग्यास लिक भइ आगलागी हुँदा एउटै परिवारका तीनजना घाइते भएका छन् ।

जिल्ला प्रहरी कार्यालय झापाले दिएको जानकारी अनुसार झापाको अर्जुनधारा नगरपालिका–७ स्थित पुष्पलाल मार्गमा शनिबार साँझ आगलागी हुँदा एकै परिवारका तीन जना आगोले जलेर घाइते भएका हुन् ।

स्थानीय रोमनाथ खनालको एकतले इँटाको पर्खालमाथि टिनले छाएको घरमा ग्यास लिक भइ आगलागी भएको थियो ।

नयाँ एलपी ग्याँसको सिलिण्डर फेर्ने क्रममा ग्यास चुहिएर उक्त घटना भएको जिल्ला प्रहरी कार्यालय झापाका प्रहरी प्रवक्ता प्रहरी नायव उपरीक्षक राकेश थापाले जानकारी दिएका थिए।

आगलागीमा परेर घरधनी ४२ वर्षीय रोमनाथ खनाल, उनकी श्रीमती ३८ वर्षीया दुर्गा खनाल र १८ वर्षका छोरा पंकज खनाल घाइते भएको प्रहरी नायव उपरीक्षक थापाले जानकारी दिएका छन ।

आगोले जलेका तीनै जनाको अवस्था सामान्य रहेको र उपचारका लागि विराटनगर स्थित नोवल मोडिकल कलेज लगिएको प्रहरीले जनाएको छ ।

आगलागी नियन्त्रणका लागि विर्तामोड नगरपालिकाको वारुणयन्त्र, नेपाल प्रहरी र स्थानीयहरुको सहयोगमा साँझ ७ः३० बजे आगो पूर्णरुपमा नियन्त्रणमा आएको थियो ।