नेपालगन्ज उपमहानगरका नयाँ प्रमुख प्रशासकीय अधिकृत बस्नेतको स्वागतसँगै सुवेदीको बिदाइ

हाम्रा कुरा

प्रकाशित २०७८ माघ २४ सोमबार

नेपालगन्ज । नेपालगन्ज उपमहानगरपालिकामा सरुवा भई आएका नयाँ प्रमुख प्रशासकीय अधिकृत जगत बस्नेतलाई स्वागत गरिएको छ । त्यस्तै सरुवा भएर काठमाडौं जान लागेका यसअघिका प्रमुख प्रशासकीय अधिकृत गुरुदत्त सुबेदीको बिदाइ गरिएको छ ।

नेपालगन्ज उपमहानगरपालिकाका मेयर डा. धवल शमशेर राणाको प्रमुख आतिथ्यतामा आज गरिएको स्वागत तथा बिदाइ कार्यक्रममा कार्यालयका शाखा प्रमुख लगायत कर्मचारीहरूको उपस्थिति रहेको थियो ।

कार्यक्रममा बोल्दै मेयर डा. राणाले नेपालगन्ज उपमहानगरपालिकामा अवधि नपुग्दै मन्त्रालयले बारम्बार प्रमुख प्रशासकीय अधिकृतहरूको सरुवा गर्नु निकै दुःखद कुरा भएको बताए । ४/५ महिना नपुग्दै प्रमुख प्रशासकीय अधिकृतको सरुवा गर्नाले धेरै काम प्रभावित हुने मेयर राणाले बताए । काम गर्दै गरेका प्रशासकीय अधिकृतहरू बीचमै छोडेर जानुपर्ने अनि नयाँ आउनेलाई यहाँ वस्तुस्थिति बुझ्नै समय लाग्ने हुँदा उपमहानगरपालिकाको काम प्रभावित हुने मेयर राणाले बताए ।

मेयर राणाले सरुवा भएर जान लागेका सुबेदीको उज्ज्वल भविष्यको कामना गर्दै नयाँ आएका बस्नेतलाई स्वागत गर्दै सबै मिलेर उपमहानगरपालिकाको काम गर्नुपर्ने बताए । बस्नेत सुर्खेतका भेरीगंगा नगरपालिकाबाट सरुवा भएर आएका हुन् ।सरुवा भएर नयाँ आएका बस्नेतले जिल्ला प्रशासन कार्यालय बाँकेमा सहायक प्रमुख जिल्ला अधिकारीका रूपमा काम गरिसकेका छन् ।