संसद बैठक अघि देउवालाई भेट्न बालुवाटार पुगे प्रचण्ड
हाम्रा कुरा
प्रकाशित २०७८ फागुन १२ बिहिबार
673
Shares
काठमाडौं । संसद बैठक बस्नु अघि प्रधानमन्त्री शेरबहादुर देउवालाई भेट्न नेकपा(माओवादी केन्द्र)का अध्यक्ष पुष्पकमल दाहाल ‘प्रचण्ड’ बालुवाटार पुगेका छन् ।
सिंहदरबारमा नेकपा(एकीकृत समाजवादी)का अध्यक्ष माधवकुमार नेपाल, सम्मानित नेता झलनाथ खनालसँग छलफल गरे लगत्तै प्रचण्ड प्रधानमन्त्री देउवालाई भेट्न बालुवाटार पुगेका हुन् ।
प्रधानमन्त्री निवास बालुवाटारमा आज भएको छलफलमा प्रधानमन्त्रीले अमेरिकी सहयोग परियोजना एमसीसी सम्झौता प्रतिनिधि सभामा छलफल प्रारम्भ हुन लागेकाले सहयोग गर्न प्रचण्ड लाई आग्रह गरेका थिए ।
छलफलमा प्रधानमन्त्रीले एमसीसी सम्झौता पारित गर्न सहयोग गर्न प्रचण्डलाई आग्रह गरेको प्रधानमन्त्रीका प्रेस प्रमुख गोविन्द परियारले जानकारी दिए ।
नेपालसँग सिंहदरबारको छलफलमा प्रतिनिधि सभामा आजदेखि शुरु हुन लागेको एमसीसी सम्झौताका सन्दर्भमा कसरी अगाडि बढ्ने भन्नेबारेमा विचार विमर्श भएको बताइएको छ ।
प्रतिनिधि सभाको बैठक आज दिउँसो १ बजेका लागि बोलाइएको छ । बैठकमा एमसीसी सम्झौताबारे सैद्धान्तिक छलफल हुने कार्यसूची तय भएको छ ।
