काठमाडौं । प्रधानमन्त्री शेरबहादुर देउवालाई सत्ता गठबन्धन दलका शीर्ष नेताहरूले राष्ट्रिय सहमति बिना कुनै पनि सम्झौता गर्न नहुने सुझाव दिएका छन् ।
बुधवार प्रधानमन्त्री निवास बालुवाटारमा प्रचण्ड, माधवकुमार नेपाल, उपेन्द्र यादवलगायत शीर्षनेताहरुबीच भएको भेटमा राष्ट्रहित विपरीत गएर सम्झौता नगर्ने भनेका हुन् ।
नेपाल र अमेरिकाबीच स्टेट पार्टनरशिप प्रोग्राममा (एसपीपी) लाई लिएर देशको माहोल तातेको छ । प्रधानमन्त्री देउवा र प्रधानसेनापति प्रभुराम शर्माले छुट्टाछुट्टै गर्न लागेका प्रस्तावित अमेरिका भ्रमणको मुखमा यो प्रस्ताव आएसँगै तरंग पैदा भएको छ ।
१० बुँदे प्रस्तावित एसपीपी सम्झौतामा हस्ताक्षर भएमा अमेरिकी सेना नेपाल प्रवेश गर्ने छन् । सम्झौताअनुसार अमेरिकी सेना नेपालको जुनसुकै ठाउँमा नेपाली सेनाको सहयोगमा आफ्नो क्याम्प बनाएर अनिश्चितकालीन समयका लागि रहन सक्नेछ ।
यता प्रधानमन्त्री देउवा पनि राष्ट्रिय सहमति बिना कुनै पनि सम्झौता नहुने बताएका छन् । उनले देशलाई आघात पुग्ने कुनै पनि सम्झौतामा कुनै देशले चासो राखे वा दबाब दिए भने पनि आफूले नमान्ने बताएका छन् ।
आजै प्रधानमन्त्री देउवाले एसपीपी लाई लिएर सदनमा जवाफ दिँदै छन् ।
