गुरुङसँग देउवाको दु:खेसो- पछि सभापति भएपछि थाहा पाउनुहुनेछ
'एउटै पार्टीमा त समस्या हुन्छ भने गठबन्धनमा समस्या हुन्छ नै'
हाम्रा कुरा
प्रकाशित २०७९ असार २१ मंगलबार
1k
Shares
काठमाडौं । प्रधानमन्त्री तथा नेपाली कांग्रेसका सभापति शेरबहादुर देउवाले कांग्रेसका साथीहरूले नबुझेको भन्दै दुखेसो गरेका छन् । कांग्रेस उपसभापति धनराज गुरुङले गठबन्धनका दलहरूभित्र आपसी झगडा सुरु भएको बताएपछि देउवाले यस्तो जवाफ फर्काएका हुन् ।
स्व. गिरिजाप्रसाद कोइरालाको सालिक अनावरणका क्रममा बोल्दै देउवाले गठबन्धनभित्र समस्या उत्पन्न हुनुलाई सामान्य रूपमा लिनुपर्ने बताए । उनले भने,' एउटै पार्टीमा त समस्या हुन्छ भने गठबन्धनमा समस्या हुन्छ नै । यसलाई सबैले सामान्य रूपमा लिनुपर्छ । पछि सभापति भएपछि थाहा पाउनुहुनेछ । आफ्नो पार्टी मिलाउनुपर्नेमा गठबन्धन मिलाउनुपर्ने अवस्था छ । साथीहरूले यसलाई बुझ्नुपर्छ ।'
गुरुङले गठबन्धनले सहज अवतरण गर्न बाँकी नै रहेकाले दलहरुबीच मनमुटाब गर्न नहुने बताएका थिए । संविधान जोगाउनका लागि गरेको गठबन्धनलाई सेफ ल्यान्डिङ गर्नका लागि दलहरू मिल्नुपर्ने उनको भनाई छ । एक अर्कामा आरोप प्रत्यारोप गर्यो भने समस्या आउन सक्नेतर्फ गुरुङले ध्यानाकर्षण गराए ।
उनले भने,' जहाजभित्र बसेर साथीहरूले ङ्यारङ्यार ङुर ङुर गर्न हुन्न भन्ने मेरो ठहर छ । निवेदन गर्न चाहन्छु म, जहाजलाई सेफ ल्यान्डिङ गर्नुपर्ने हाम्रो दायित्व छ । या त हामीले जहाजबाट प्यारासुटट जम्प गर्नुपर्यो । प्यारासुट जम्प गर्ने हो भने खुट्टा भाँचिन्छ कि भन्ने त्रास पनि छ । जम्प पनि गर्न भा छैन, धेरै माथि उडेको छ । १० हजार साढे १० हजार फिटमाथि उडिराख्या । अब त्यसलाई सेफ ल्यान्डिङ गर्ने बेलामा कसैले भन्दिने कांग्रेस इमानदार भएन, कसैले अर्को दल इमानदार भएन भनेर अकासमा उडिरहेको जहाजभित्र हामीले झगडा गर्यौँ भने जहाजले सेफ ल्यान्डिङ गर्न सक्दैन ।'
