नेपालगञ्ज । राप्तीसोनारी गाउँपालिकाले ‘गुनासो एप्लीकेशन’ शुरु गरेको छ । पालिकाले परीक्षणका रुपमा हेलो अध्यक्ष शिर्षकमा ‘गुनासो एप्लीकेशन’ शुरु गरेको पालिकाका प्रमुख प्रशासकीय अधिकृत ओमप्रकाश देवकोटाले जनाकारी दिएका छन् ।
अध्यक्ष तप्त पौडेलले पालिकाको कामकारबाहीमा सबै जनताको पहुँच हुन सकोस् भन्ने उद्देश्यले ‘गुनासो एप्लिकेशन’ शुरु गरेको बताए ।
‘राप्तीसोनारीका जनताले पालिकाप्रति केही गुनासो भए जहाँबाट पनि गुनासो गर्न मिल्ने र उनीहरुले हामीसँग सिधै कुराकानी गर्न सकून् भन्ने उद्देश्य हाम्रो हो,’ पौडेलले भने ।
पालिकाले शुरुआत गरेको ‘गुनासो एप्लिकेशन’ मा जनताले गुनासो दर्ता गर्न मिल्ने, पालिकासँग कुराकानी गर्न मिल्ने, अनुदानका क्षेत्रहरु थाहा पाउन सक्ने प्रमुख प्रशासकीय अधिकृत देवकोटाले जानकारी दिए ।
त्यस्तै ‘गुनासो एप्लिकेशन’मा नागरिक बडापत्र पनि राख्ने तयारी रहेको राप्तीसोनारीले जनाएको छ । जसमा नेपाली, थारु र अवधि गरी ३ भाषामा नागरिक बडापत्र उल्लेख गरिने बताइएको छ ।
