पोखरा । नेपाली कांग्रेसका सभापति एवं पूर्व प्रधानमन्त्री शेरबहादुर देउवा आज पोखरा आउने भएका छन् ।
नेपाली कांग्रेस गण्डकी प्रदेशको प्रथम सम्मेलन उद्घाटन गर्न सभापति देउवा पोखरा आउने भएका हुन् ।
सभापति देउवाका साथमा पार्टीका शीर्षस्थ नेता कार्यक्रममा सहभागी हुने बताइएको छ ।
सम्मेलनमा गण्डकी प्रदेशका ११ जिल्लाका करिब ५ सय प्रतिनिधिले भाग लिने प्रवक्ता मधु बास्तोलाले बताए ।
प्रतिनिधि पोखरा आउनेक्रम जारी छ । सम्मेलनको पहिलो दिन पोखरा सभागृहमा उद्घाटन र भोलिपल्ट पोखरा पार्टी प्यालेस बास्तोलाथरमा बन्दसत्र हुनेछ ।
सम्मेलनमा कांग्रेस गण्डकी प्रदेशका सभापति शुक्रराज शर्माले अवधारणा पत्र पेस गर्नेछन् ।
यस्तै, महामन्त्री किरणबाबु श्रेष्ठले संगठन प्रतिवेदन र अर्का महामन्त्री विष्णुप्रसाद लामिछानेले राजनीतिक प्रतिवेदन एवं कोषाध्यक्ष वसन्तकुमार श्रेष्ठको आर्थिक प्रतिवेदन पनि प्रस्तुत गर्ने कांग्रेस गण्डकी प्रदेश सूचना, सञ्चार तथा प्रचारप्रसार विभाग प्रमुख रमेश पौडेलले बताए ।
सम्मेलनले पार्टीलाई विधान बमोजिम सञ्चालन गर्न र जनतासँग जोडिने गरी नयाँ कार्यक्रम तय गर्न सहज हुने भन्दै पार्टीलाई सशक्त र गतिशील बनाउन बल पुग्ने गण्डकी प्रदेश सभापति शुक्रराज शर्माले बताए ।
