काठमाडौँ । प्रधानमन्त्री केपी शर्मा ओलीले पहिले मिलेर संविधान बनाएकाले फेरि पनि मिलेरै संविधान परिमार्जन गर्ने बताएका छन् ।
प्रतिनिधि सभाको बैठकमा सम्बोधन गर्ने क्रममा प्रधानमन्त्री ओलीले सबै दलहरु र समाजको सबै वर्ग मिलेर समावेशी आधारमा संविधान बनाएकाले संशोधन गर्दा पनि मिलेरै परिमार्जन गर्ने बताएका हुन् ।
उनले लोकतन्त्रको विकल्प तानाशाह नहुने भएकाले लोकतान्त्रिक संविधानलाई तानाशाहीयुक्त बनाउनै नसक्ने भएकाले शंका उपशंका नगर्न पनि आग्रह गरे ।
उनले सो क्रममा सरकारले सधै लोकतन्त्रको सम्मान गर्ने बताउँदै पछिल्लो समय लोकतन्त्र विरुद्ध केही प्रवृत्ति देखिन थालेको भन्दै सचेत गराएका छन् ।
के गरे के हुन्छ भन्ने थाहा नभएकाहरु कुनै गन्तव्य बिना लोकतन्त्रविरुद्ध बोल्न थालेको भन्दै सरकार यस विषयमा गम्भीर भएको बताएका छन् ।
लोकतन्त्रका लागि धेरैको बलिदान भएको भन्दै बलिदान कसैको पनि ख्यालख्यालमा नजाने गरी सरकार गम्भीर भएको बताए ।
उनले प्रजातन्त्रका लागि शवसमेत विदेशबाट स्वदेशमा ल्याउन नदिइएको र निर्वाचित प्रधानमन्त्रीसमेत जेल गएर बस्नुपर्ने अवस्था देखेको मुलुकमा फेरि पनि पुरानो गलत पुनरावृत्ति हुन नदिने उनले दृढता व्यक्त गरे ।
उनले दीगो र टिकाउ लोकतन्त्र मात्र भएकाले यो प्रणालीलाई व्यवस्थित गर्नका निम्ति नेपाली जनताले सबैको प्रतिनिधित्व गरेर दुई पटकको संविधान सभामार्फत संविधान लेखिएको बताए ।
प्रधानमन्त्री ओलीले सत्य निरुपण तथा मेलमिलाप (टीआरसी) सहमतिमै छिट्टै टुंगिने विश्वाससमेत व्यक्त गरेका छन् ।
१८ वर्ष लामो यो श्रृंखला अब विधेयक संसदमा छिट्टै पारित भइ कार्यान्वयन पनि छिट्टै हुने विश्वास गरे ।
उनले केही समयपछि नै शान्ति प्रक्रिया सफलतापूर्वक टुंग्याउने बताए । उनले नेपाल नै विश्वकै अनुकरणीय देश हुने दाबी गरे ।
