साढे तीन वर्षअघि नै उद्घाटन भएको धरहरा अझै अपूर्ण, बिहीबार फेरि उद्घाटन [फोटोफिचर]
हाम्रा कुरा
प्रकाशित २०८१ असोज २ बुधबार
243
Shares
काठमाडौँ । प्रधानमन्त्री केपी शर्मा ओलीले २०७८ बैशाख ११ गते उद्घाटन गरेको धरहरा साढे तीन वर्षपछि बल्ल सर्वसाधारणका लागि खुला गरिँदैछ । धरहरा बिहीबार संविधान दिवसको अवसर पारी सर्वसाधारणको लागि खुला गरिने भएको हो ।
यो खुला पनि नियमित भने अझै हुने छैन । यसलाई कुनै पनि बेला फेरि बन्द गरिन सक्छ । ६ पटकसम्म म्याद थप गरिएको धरहरा बिहीबार फेरि उद्घाटन हुन लागेको हो ।
भूकमपको एक दशकसम्म पनि पुनःनिर्माण सम्पन्न हुन नसकेको धरहरा फेरि पनि हतारमै उद्घाटन हुन लागेको हो ।२०७२ को बैशाख १२ गते गोरखा भूकम्पमा परी भत्किएको धरहराको भग्नावशेष सिसामा राख्ने भनिएको भए पनि अझै पनि धरहराको अवशेष टिनको छाना हालेर राखिएको छ ।
यो आयोजना पुनःनिर्माण प्राधिकरणको समय सीमा भित्र निर्माण हुन नसकेपछि सहरी विकास मन्त्रालय मातहत सहरी विकास तथा भवन निर्माण विभागबाट आयोजना कार्यान्वयन भइरहेको छ ।
