काठमाडौँ । असोज १०, ११ र १२ गते गरी तीन दिन लगातार परेको पानीका कारण देशका अधिकांश राजमार्गहरु पहिरोका कारण अवरोध भएसँगै मालबाहक सवारीहरु पनि हप्तादिन सडकमै बस्न पर्ने अवस्था आयो ।
जसका कारण छिमेकी देश भारतबाट ल्याइएका तरकारी विशेष गरी अधिकांश आलु बाटोमै कुहियो र केही सद्दे रहेका आलु व्यापारीहरुले सुकाउन थालेका छन् ।
लाखौँको घाटा लागेको छ । कुहिएकोलाई फ्याँक्ने र सद्दे आलुलाई सुकाउने काम अहिले कालिमाटी फलफूल तथा तरकारी बजारमा भइरहेको छ ।
त्यहाँका अधिकांश व्यापारीहरुले लाखौँको आलु फ्याँक्न परेको तर सरकारले केही राहत नदिएको गुनासो गरिरहेका छन् ।
भारतको गुजरात, पंजाब लगायतका स्थानबाट नेपालमा आलु आयात हुने र सो आलु १ बोरा किन्दा प्रति केजी ५७-५८ रुपैयाँ पर्ने भएता पनि अहिले बाटोका कारण धेरै आलु कुहिएको र घाटा सन्तुलन गर्नका लागि केही महँगो भएको व्यापारी सन्तोष ओस्तीले बताए ।
उनले आफ्नै ३ लाख रुपैँया क्षति भएको र साथीहरुले त गाडीका गाडी फ्याँक्नु परेको सुनाए ।
