काठमाडौं । पूर्व प्रधानमन्त्री एवं नेकपा (माओवादी केन्द्र) का अध्यक्ष पुष्पकमल दाहाल प्रचण्डले राजावादी सक्रिय हुनुको पछाडि सरकारको शासकीय शैली र त्यसबाट उत्पन्न भएको असन्तोष रहेको टिप्पणी गरेका छन् । प्रतिनिधि सभाको मंगलबारको बैठकलाई सम्बोधन गर्दै प्रचण्डले यस्तो बताएका हुन् । 

उनले राजावादीहरू सक्रिय हुनुको पछाडि सङ्गठित प्रयास रहेको आशंका समेत व्यक्त गरे । उनले नक्कली भुटानी शरणार्थी गङ्गामा धोएर फोहोर लोकतन्त्र बनेको बताए । उनले प्रतिगमन सफल बन्न नदिइने बताए । उनले नेपालमा शान्ति प्रक्रिया मात्र नभई गणतन्त्रको इतिहास समेत मौलिक र उदार रहेको बताए । उनले पूर्वराजाको सुरक्षासहित ल्याइएको गणतन्त्रमाथि प्रहार गर्न खोजिए अबको क्रान्ति निकै निर्मम हुने समेत चेतावनी दिए ।

उनले भने, ‘राजावादीका पछि सङ्गठित प्रयास छ भन्ने कुरा हामीलाई थाहा छ । यसमा देशभित्र र देश बाहिरका चलखेल पनि मिसिएका छन् । तर यस खालका चलखेल आज मात्र भएका होइनन् । नेपालमा यस्ता खालका चलखेलहरू हिजो पनि थिए, अस्ति पनि थिए । तर अहिले किन वृद्धि भयो मुख्यतः प्रश्न यहाँनिर रहेको छ । पछिल्लो आठ महिनामा सत्तामा रहेका पार्टीहरूले प्रदर्शन गरेका शासकीय शैली र त्यसबाट उत्पन्न असन्तोष नै यसको मूल कारण हो भनेर बुझ्न अब कठिनाइ छैन । आज म चेतावनीका साथ भन्न चाहन्छु नेपालको शान्ति प्रक्रिया मात्र होइन गणतन्त्रको इतिहास पनि बडो मौलिक र निकै उदार रहेको छ । संसारभरीको गणतन्त्रको इतिहासमा राजतन्त्रको रगतले गणतन्त्र लेखिएको पाइन्छ । तर नेपाल त्यसको अपवाद बन्यो ।’

उनले वर्तमान सरकारले लोकतन्त्रको लक्ष्मण रेखा नाघेको आरोप लगाए । दुई तिहाइको वर्तमान सरकार नै संघीय लोकतान्त्रिक गणतन्त्र नेपालको लागि घातक हुने उनको जिकिर छ । वर्तमान सरकार र सत्तारुढ दलहरूले सङ्ख्याको अहङ्कारमा सत्ताको दुरुपयोग गरिरहेको  प्रचण्डको आरोप छ । उनले सरकारले प्रतिपक्ष र जनतलाई महत्त्व नदिएकै कारणले जनता सडकमा ओर्लिने अवस्था सिर्जना भएको बताए ।

उनले भने, ‘यो दुई तिहाइ नै नेपालको लोकतन्त्रको लागि, नेपालको संघीय लोकतान्त्रिक गणतन्त्रको लागि घातक हुने त होइन भन्ने प्रश्न जनताको मनमा जन्मिसकेको छ । यसमा तपाईँहरूलाई गम्भीर रूपमा सोच्न अनुरोध मात्र गर्न सक्छु अहिले । यो सङ्ख्याको अहङ्कार त छदैछ । त्यो अहँकारकबाट सत्ताको दुरुपयोग शुरु भयो । प्रतिपक्ष र जनताको रचनात्मक खबरदारीलाई सरकारले कुनै भाउ नदिएकै कारण आज जनता सडकमा ओर्लिने अवस्था आएको छ । र तपाईँहरूलाई लागेको होला हामीसँग दुई तिहाइ छ कसले के गर्न सक्छ ? सर्वप्रथम त तपाईँले लोकतन्त्रको लक्ष्मण रेखा नाघ्ने गर्नुभएको छ । यो सरकारको जन्म नै लोकतन्त्र विरुद्ध भयो, संविधान विरुद्ध भयो भन्ने मेरो गम्भीर भनाई छ । पहिलो र दोस्रो पार्टी मिल्ने कुरा नै लोकतन्त्रको मूल मर्म विपरीत छ । ’

वर्तमान सरकार प्रधानमन्त्री र मन्त्रीहरूले नभई बिचौलियाहरूले चलाइरहेको टिप्पणी गरे ।  उनले पछिल्लो आठ महिनामा बिचौलियाको प्रभावबिना गरेका निर्णय र नियुक्ति देखाउन सरकारलाई चुनौती समेत दिए । अध्यक्ष दाहालले वर्तमान सरकारको ड्राइभिङ सिटमै बिचौलिया रहेको आरोप लगाए । 

उनले भने, ‘सरकारको दुई तिहाइको घोडा सरकारका प्रधानमन्त्री र मन्त्रीहरूले चलाएको मैले चाहिँ देखेको छैन । त्यो घोडा बिचौलियाहरूले चलाएका छन् । तपाईँहरूले गर्ने नियुक्ति, तपाईँहरूले गर्ने सेटिङ तपाईँहरूले गरेको मैले त देख्दिन ती त बिचौलियाहरूले उनीहरूले निर्णय गरेअनुसार भएको देखेको छु । म चुनौतीका साथ भन्न चाहन्छु पछिल्लो आठ महिनामा एउटै नियुक्ति, एउटै, नीति र एउटै निर्णय मलाई भनिदिनुस् जसका पछाडि बिचौलिया छैन । जम्मा एउटा उदाहरण दिए मात्र हुन्छ । सत्ताको ड्राइभिङ सिटमै बिचौलिया छ ।’