काठमाडौं महानगरपालिकाको उपमेयरमा महिलाहरुको मात्रै दाबेदारी, कुन पार्टीबाट को ?

प्रकाशित मिति : २०७३ चैत ९ बुधबार
काठमाडौं । काठमाडौं महानगरपालिकाको मेयरमा उम्मेदवारी दिन आकांक्षा देखाउनहरुको चर्चा चलेसँगै सोही निकायको उपप्रमुखको रुपमा रहने उपमेयरको लागि पनि दौडधुप सुरु भएको छ । महानगरपालिका त्यसैमा पनि मुलुकको राजधानी पर्ने काठमाडौंको उपप्रमुखका लागि पनि राजनीतिक दलहरुबीच ठूलै हानाथाप सुरु भएको छ । मेयरमा एउटा पक्षको उठाए उपमेयरमा अर्कै पक्षको उठाउनु पर्नेमा पार्टीका केन्द्रीय गुटमा नै चर्चा चल्न थालिसकेको छ ।
 
त्यसो त मेयरको रुपमा पुरुषलाई अघि सारेका ठूला दल नेपाली काँग्रेस र नेकपा एमालेले उपमेयरमा भने बाध्य भएर महिलाहरुलाई नै अगाडि सारेका छन् । हामीलाई प्राप्त विवरण अनुसार अहिलेसम्म कोही पनि पुरुषले उपमेयरको लागि उम्मेदवारी दिएका छ्रैनन् । कानूनले नै मेयर वा उपमेयर मध्ये एकजना महिला हुनुपर्ने अनिवार्य व्यवस्था गरेकोले यस्तो गरिएको हो । 
 
अहिले काठमाडौंमा नेपाली काँग्रेस र नेकपा एमालेका आकांक्षीहरुले मात्रै खुलेर मेयर तथा उपमेयरमा आकांक्षा देखाएको पाईएको छ । त्यस भन्दा बाहेकका पार्टीबाट उपमेयरको लागि कसले उम्मेदवारी दिन्छन् भन्नेमा भन्न सकिने अवस्था अहिलेसम्म देखिँदैन । उनीहरुको अहिलेसम्म चर्चा चलेको छैन ।  
 
काठमाडौं महानगरपालिकाको उपमेयरको लागि अहिलेसम्म ५ जनाले आकांक्षा देखाएका छन् । यसरी आकांक्षा देखाउनेमा काठमाडौं जिल्ला क्षेत्र नं २ मा एमाले नेता माधव नेपालसँग पराजीत भएकी प्रतीमा गौतम समेत रहेकी छिन् । उनी बाहेक पनि काँग्रेसबाट कल्याणी रिजाल, जानु घिमिरे, हरिप्रभा खड्गी र जीवन डंगोलको नाम चर्चामा छ । 
 
त्यस्तै, एमालेबाट पनि उपमेयरमा ३ जनाले उम्मेदवारीकोलागि आकांक्षा देखाएका छन् । यसरी उपमेयरमा उठ्ने सोच बनाएकाहरुमा सुजिता शाक्य, विद्या न्यौपाने, रन्जना मास्के छन् । जसमध्ये शाक्य पार्टीको केन्दीय सदस्य पनि हुन् भने श‌ंकर पोखरेलकी श्रीमती पनि हुन् । 
 
नेकपा माओबादी केन्द्र र राप्रपा भने यस विषयमा समय कुरेर बसिरहेका छन् । उनीहरु राष्ट्रिय राजनीतिमा चर्चामा देखिएका अनुहारलाई भित्र्याएर उपमेयरमा उठाउने कि भन्ने मनस्थितीमा समेत देखिएको स्रोतले बताएको छ । राप्रपामा केहीले उपमेयरको लागि आकांक्षा देखाईरहेको भएपनि उनीहरुले टिकट पाउने सम्भावना नै नरहेको राप्रपा निकट स्रोतले जनाएको छ । 
 
सम्बन्धित समाचार
 

ईआइसिटी नेपाल प्रालिद्धारा संचालित हाम्राकुरा डटकममा प्रकाशित कुनै पनि सामाग्री ईआइसिटी नेपालको पूर्व जानकारी विना हुवहु एवं आंशिक रुपमा समेत कपी गरि प्रकाशन गर्नु दण्डनीय छ। यस किसिमका कार्य गर्ने उपर ईआइसिटी नेपाल कानुनी उपचार खोज्न बाध्य हुने भएकाले सम्बन्धित सवैलाई सचेत हुन जानकारी गराइन्छ।

नयाँ