भूकम्पपीडितका लागि अनुदान सम्झौता सुरु

प्रकाशित मिति : २०७४ बैशाख ४ सोमबार
तस्वीर– फाइल

रत्ननगर। चितवन जिल्लाका साविक तीन गाविसमा भूकम्पपीडितका लागि अनुदान सम्झौता सुरु गरिएको छ। चितवनको साविक गाविस सिद्धी, दारेचोक र लोथरका एक हजार ८४९ जना भूकम्पपीडितका लागि अनुदान सम्झौता सुरु भएको जिल्ला समन्वय समिति चितवनका सूचना अधिकारी बलराम लुइँटेलले जानकारी दिए।

उनका अनुसार सिद्धीमा २९४, लोथरमा ४४० र दारेचोकमा एक हजार ११५ जना भूकम्पपीडितलाई पहिलो चरणको अनुदान रकमका लागि सम्झौता थालिएको हो। सम्झौतालगत्तै भूकम्पपीडितले बैंक खाता खोलेपछि अनुदान रकम दिइने छ । 

उनीहरुका लागि अनुदान दिन जिल्लामा पुनःनिर्माण प्राधिकरणमार्फत रु नौ करोड ३० लाख रकम आइपुगेको जिल्ला समन्वय समितिको कार्यालयले जनाएको छ। जिल्लामा कुल करिब १५ हजार भूकम्पपीडितको नाम आएको छ । 

त्यसमध्ये तीनठाउँको नामावली प्राधिकरणबाट आएकाले अनुदान सम्झौता सुरु भएको र अरु क्षेत्रका भूकम्पपीडितको नामावली आइसकेको छैन। माघ पहिलो साताबाट यहाँ पीडितको लगत सङ्कलन थालिएको थियो । 

चितवन जिल्लामा १८ हजार ७५२ परिवारले भूकम्पपीडित भनेर राहतका लागि निवेदन दर्ता गराएका थिए। 

तर यहाँ तथ्याङ्क विभागले घरघरै पुगेर विवरण सङ्कलन गरेको थियो। 

फोटोसहितको विवरण सङ्कलन गर्न इन्जिनियर र सामाजिक परिचालकको टोली गाउँगाउँमा खटिएका थिए।

उनीहरुमार्फत १५ हजारको मात्रै नामावली सङ्कलन भएको छ । नाम छुटेको भनेर जिल्लामा सयौँको निवेदन परेको छ । 

जिल्ला लगत सङ्कलन तथा व्यवस्थापन कार्यालय चितवनका संयोजक जीवनाथ आचार्यले कुनै नाम छुटेका भएपछि निवेदन दिन सकिने जानकारी दिए । उनले धेरैको नाम दोहोरिएको पाइएको जानकारी दिए । 

पुनःनिमाण प्राधिकरणले अन्तिम सूची निकालेपछि सूचीमा नाम परेकाले सरकारको रु तीन लाख राहत प्याकेज पाउँछन् । रासस 

ईआइसिटी नेपाल प्रालिद्धारा संचालित हाम्राकुरा डटकममा प्रकाशित कुनै पनि सामाग्री ईआइसिटी नेपालको पूर्व जानकारी विना हुवहु एवं आंशिक रुपमा समेत कपी गरि प्रकाशन गर्नु दण्डनीय छ। यस किसिमका कार्य गर्ने उपर ईआइसिटी नेपाल कानुनी उपचार खोज्न बाध्य हुने भएकाले सम्बन्धित सवैलाई सचेत हुन जानकारी गराइन्छ।

नयाँ