वेष्ट इन्डिजविरुद्धको एक दिवसीय सिरिज भारतलाई, कोहलीले तोडे सचिनको कीर्तिमान
प्रकाशित २०७४ असार २३ शुक्रबार
324
Shares
किंगसटन । वेष्ट इन्डिजविरुद्धको एक दिवसीय क्रिकेट सिरिज भारतले जितेको छ । शुक्रबार बिहान किंगसटनमा सम्पन्न पाँचौं तथा अन्तिम खेलमा ८ विकेटको जित हासिल गर्दै भारतले सिरिज ३–१ ले जितेको हो ।
खेलमा वेष्ट इन्डिजले पहिले ब्याटिङ गर्दै ९ विकेटको नोक्सानीमा २०५ रन बनायो । साइ होपले ५१ तथा कायल होपले ४६ रन बनाएको इनिङमा सस्तैमा रोक्ने क्रममा मोहम्मद सामीले ४, उमेश यादवले ३ विकेट लिए ।
प्रतिउत्तरमा भारतले ३६.५ ओभरमै २ विकेटको नोक्सानीमा जित हासिल गर्यो ।
तेस्रो विकेटका लागि नटआउट १२२ रनको साझेदारी गर्ने क्रममा कप्तान विराट कोहलीले १११ तथा दिनेश कार्तिकले ५० रन बनाए ।
यो खेलमा ११५ बलमा सतक बनाएका कोहलीले सचिन तेन्दुलकरको कीर्तिमान तोडेका छन् ।
लक्ष्य पछ्याउने क्रममा सतक बनाउने मामलामा कोहली सचिनभन्दा अगाडि बढेका हुन् ।
सचिनले लक्ष्य पछ्याउने क्रममा १७ सतक बनाएका थिए भने कोहलीले १८ सतक बनाएका छन् ।
अन्तिम खेलमा ३९ रन बनाएका अजिन्क्या रहाने म्यान अफ द सिरिज बनेका छन् ।
