गुगलले नेपालमा सरभर स्तराेन्नति नगर्दा प्रयोगकर्तालाई सास्ती

प्रकाशित २०७४ भदौ १५ बिहिबार

काठमाडौं । गुगलले नेपालमा रहेको सरभर स्तराेन्नति (अपडेट) नगरेका कारण नेपालका इन्टरनेट प्रयोगकर्ताले सास्ती भोग्न बाध्य भएका छन् । प्रयोगकर्ताले गुगलका एप्लिकेसन्स जिमेल , यूट्युब ढिलो खुल्ने समस्या रहेको गुनासो गरेका छन् । प्रयोगकर्ताका गुनासोका आधारमा इन्टरनेट सेवा प्रदायक संघ नेपाल (आइस्पान) ले विगत केही हप्ता देखि गरेको खोजिबाट गुगलले नेपालमा रहेको सरभर स्तराेन्नति (अपडेट) नगरेका कारण सो समस्या आएको जनाएको छ ।

गुगलले ४ बर्ष देखि नेपालका स्थानीय इनटरनेट सेवा प्रदायक कम्पनीहरुमा आफ्नो सरभर राखेको थियो । गुगलले आफ्नो एप्लिकेसन्सको क्षमता सुधारका लागि सो सरभर राखेको हो । तर पछिल्लो समय गुगल आफैले आफ्नै नयाँ सरभर राख्ने तयारी गरेको छ ।

सोहि कारण गुगलले यहाँका कम्पनीहरुमा रहेको सरभरलाई स्तराेन्नति गरेको छैन । त्यसैले इन्टरनेटको बढी प्रयोग हुने समय (वेलुका) मा सरभरको क्षमता अपुग भएको छ । इनटरनेट सेवा प्रदायक कम्पनीहरुले गुगललाई बारम्बार अनुरोध गरेपनि सरभर स्तरउन्नोति गरेको छैन भने गुगलले आफनो सरभर राख्न पनि ढिलाई गरेको छ ।