मलेसिया । नेपाल मलेसियामा भएको एसीसी यू–१९ इस्टर्न रिजन क्रिकेट प्रतियोगिताको उपाधि सहित एसिया कपमा स्थान बनाउन सफल भएको छ ।
आइतबार किन्रारा मैदानमा भएको फाइनलमा नेपालले हङकङलाई ५ विकेटले हरायो । ७७ रनको विजयी लक्ष्य नेपालले १४.४ ओभरमै ५ विकेट गुमाएर पुरा गरेको हो ।
कप्तान दिपेन्द्र सिंह ऐरीले २२, सन्दिप सुनार र प्रदिप थापा मगरले १९–१९ रन बनाए ।
यसअघि नेपालले शानदार बलिङ गरेपछि हङकङले ३२.१ ओभर मात्र मैदानमा टिकेर ७६ रन बनायो ।
ओपनिङ ब्याट्सम्यान हरप्रित सिंहले २० रन बनाएको इनिङमा ८ खेलाडीले दोहोरो अंकसमेत बनाउन सकेनन् ।
नेपालका लागि सन्दिप लामिछानेले ८ रन खर्चेर ३ विकेट लिए । सन्दिप प्रतियोगिताकै सर्वाधिक १६ विकेट लिने खेलाडीसमेत बनेका छन् ।
सहाब आलमले पनि ३ विकेट लिए । दिपेन्द्र सिंह ऐरी र अनिल कुमार साहले १–१ विकेट झारे । दिपेन्द्र सर्वाधिक विकेट लिने दोस्रो खेलाडी बनेका छन् । उनले १३ विकेट लिएका छन् ।
दुई खेलाडी रन आउट भए ।
सेमिफाइनलमा आयोजक मलेसियालाई हराउँदै नेपाल र सिंगापुरलाई हराउँदै हङकङ फाइनलमा पुगेको थियो ।
