कानपुर । भारतले तेस्रो तथा अन्तिम एक दिवसिय क्रिकेटमा न्युजिल्याण्डमाथि ६ रनको नाटकिय जित हासिल गरेको छ ।
कानपुरमा आइतबार राति भएको खेलमा जित हासिल गरेसंगै भारतले तीन खेलको सिरिज २–१ ले जितेको छ ।
भारतले यो सिरिज जितेर अहिलेसम्म खेलेका ११ सिरिजमा जितसंख्या ७ बनाएको छ । ४ वटा न्युजिल्याण्डले जित्दा २ खेल बराबरीमा सकिएका थिए ।
भारतले आफ्नो भुमिमा खेलेका ६ वटै सिरिज जितेको छ ।
भारतले लगातार सिरिज जित संख्यालाई ७ बनाएको छ ।
सन् २०१६ को जुनपछि भारतले कुनै पनि एक दिवसिय सिरिज हारेको छैन । भारतले जिम्बाब्वे, इंगल्याण्ड, न्युजिल्याण्ड, वेष्ट इन्डिज, श्रीलंका, अष्ट्रेलिया र फेरि न्युजिल्याण्डलाई हराएको छ ।
आइतबार राति भएको खेलमा भारतले रोहित शर्माको १४७ तथा कप्तान विराट कोल्हीको ११३ रनको मद्धतमा ६ विकेटको नोक्सानीमा ३३७ रन बनायो ।
जवाफमा न्युजिल्याण्डले जित नजिक पुगेर पनि ७ विकेटको नोक्सानीमा ३३१ रनमै रोकिनु पर्यो ।
कोलिन मुन्रोले ७५, टोम लाथमले ६५ तथा कप्तान केन विलियमसनले ६४ रन बनाए । जसप्रित बुमराहले ३ विकेट लिए ।
रोहित म्यान अफ द म्याच भए भने विराट म्यान अफ द सिरिज भए ।
