- सुन चाँदी दर
- विनिमय दर
- नेपाली पात्रो
- राशिफल
जुम्ला । नेपाल कम्युनिष्ट पार्टी विप्लबका कार्यकर्ताले सिंजा गाउँपालिका–२ रनुखानागाउँबाट मतदाता शिक्षा सामग्री खोसेका छन् ।
रोपनी जनजागृति प्रावि रनुखाना धापा मतदान केन्द्रका मतदातालाई मतदाता शिक्षा दिन जाँदै गर्दा नेकपाका कार्यकर्ताले मतदाता शिक्षा सामग्री खोसेर लगेको निर्वाचन शिक्षा सहजकर्ता राधा श्रेष्ठले जानकारी दिइन् ।
“बाटोमा हिँडिरहेको बेला एक्कासि पाँच–छ जना आएर मतदाता शिक्षा सामग्री दिनुस् भने र हातबाट खोसेर लगे”–उनले भनिन् ।
निर्वाचन शिक्षा सामग्रीसँग सम्बन्धित केही पोष्टर, पम्पलेट र नमूना कार्ड उनीहरुले लगेपनि मतदातालाई शिक्षा दिने केही सामग्री आफूसँग सुरक्षित रहेको उनले बताइन् ।
रनुखाना मतदान केन्द्रका लागि सहजकर्ता श्रेष्ठ र जयशंकर चौलागाईँ खटिएका छन् ।
रनुखानामा भएको घटनाबारे आफू नेपालगञ्जबाट जुम्ला पुग्नेबित्तिकै थाहा पाएको र अहिले त्यसक्षेत्रको सुरक्षा अवस्थालाई कडा बनाइएको प्रमुख जिल्ला अधिकारी विष्णुबहादुर पौडेलले जानकारी दिए ।
अतिसंवेदशील केन्द्रका रुपमा ठानिएको उक्त मतदान केन्द्रमा अब मतदाता शिक्षा दिन कुनै असहज नहुने उनले विश्वास दिलाए । रासस