युथ एसिया कप क्रिकेटः नेपाल सेमिफाइनलबाटै बाहिरिने पक्का, भारतलाई हराउनु नै ठूलो उपलब्धी
प्रकाशित २०७४ मंसिर १ शुक्रबार
149
Shares
क्वालालम्पुर । नेपाल एसीसी यु–१९ युथ एसिया कप क्रिकेट प्रतियोगिताको सेमिफाइनलबाटै बाहिरिने पक्का भएको छ । अफगानिस्तान निकै हावी भएपछि नेपाल बाहिरिने पक्का भएको हो ।
मलेसियाको किन्रारा ओभलमा १०४ रनको झिनो लक्ष्य पछ्याइरहेको अफगानिस्तानले २८ ओभरमा १ विकेटको क्षतिमा ९४ रन बनाइसकेको छ । वर्षाले खेल रोकिए पनि पूरै दिन खेल नभए पनि डर्कवर्थ लुइस नियममा नेपालले हार्ने छ ।
नेपालका लागि कमल सिंहले १ विकेट लिए भने अहम् खेलमा बाँकी सबै बलर फ्लप भए ।
नेपालले समुह चरणमा भारतलाई हराउनु नै ठूलो उपलब्धी भयो । सेमिफाइनलमा भने नेपालले टस हारेर पहिले ब्याटिङ गर्दै नसोचेको प्रदर्शन गरेको छ ।
खराव ब्याटिङ गर्ने क्रममा नेपाल १०३ रनमा आउट भयो । नेपालले २७ ओभर मात्र खेलेर अलआउट हुँदै रन बनायो ।
सुरुवातमै विकेट गुमाएका नेपालका लागि अनिल कुमार साहले आक्रामक खेल्दै नेपालको योगफलमा सुधार गर्न खोजे
अनिलले ५७ बलमा अर्धसतक पूरा गरे । उनले एक छक्का र ७ चौका प्रहार गरेका हुन् ।
अनिल बाहेक कुनै खेलाडी जम्न सकेनन् ।
कप्तान दिपेन्द्र सिंह ऐरी ६, भीम सार्की ६, रोहित कुमार पौडेल ४, जितेन्द्र सिंह ठकुरी १ र आसिफ शेख खाता नखोली आउट भए ।
पवन सर्राफले अनिललाई साथ दिँदै ८ रन बनाए । कमल सिंह र किशोर महतोले खाता खोलेनन् । अन्तिम विकेटका लागि खेल्ने क्रममा सन्दिप लामिछाने र सहाब आलमले ७–७ रन बनाए ।
अफगानिस्तानका लागि मुजिब रेहमानले अहिलेसम्मकै उत्कृष्ट बलिङ गरे । मुजिबले २६ रन खर्चेर ६ विकेट लिए ।
नेपालले समुह चरणमा भारत र मलेसियालाई हराएर समुह उपविजेता बन्दै सेमिफाइनलमा पुगेको हो । अफगानिस्तान भने अर्को समुहको विजेता बन्दै सेमिफाइनलमा पुगेको हो ।
यो खेलको विजेताले फाइनलमा पाकिस्तानको सामना गर्नेछ । पाकिस्तानले बिहीबार बंगलादेशलाई २ रनले पराजित गर्दै फाइनलमा स्थान बनाएको हो ।
पहिलो पटक सेमिफाइनल खेलिरहेको नेपालले फाइनल पुगेर इतिहास रच्न चाहन्छ ।
