च्याम्पियन्स लिगमा को को विजयी ? को पुग्यो नकआउट चरणमा ?
प्रकाशित २०७४ मंसिर २० बुधबार
513
Shares
काठमाडौं । च्याम्पियन्स लिग फुटबलको मंगलबार रातिका खेलहरुमा उपाधिका दावेदार क्लवहरु बार्सिलोना, म्यानचेस्टर युनाइटेड, युभेन्टस र बायर्न म्युनिख विजयी भएका छन् ।
समुह ए को खेलमा इंगलिस क्लव म्यान्चेस्टरले रसियन क्लव सिएसकेए मस्कोलाई २–१ ले हरायो । रोमेलु लुकाकु र मार्कस रसफोर्डले गोल गर्दै म्यानचेस्टरलाई जिताए ।
यो समुहबाट स्विस क्लव एफसी बाजलले पोर्चुगिच क्लव बेनिफिकालाई २–० ले हरायो ।
समुह ए बाट म्यान्चेस्टर युनाइटेड र एफसी बाजल नकआउट चरणमा पुगेका छन् ।
समुह बी का खेलहरुमा जर्मन क्लव बायर्न म्युनिखले फ्रेन्च क्लव पेरिस सेन्ट जर्मेनलाई ३–१ ले हरायो ।
त्यसैगरी बेल्जियन क्लव एन्डरलेच्टले स्कटिस क्लव सेल्टीकलाई १–० ले हरायो ।
यो समुहबाट पेरिस सेन्ट जर्मेन र बायर्न म्युनिख अर्को चरणमा प्रवेश गरे । पिएसजी समुह विजेता भएको हो ।
समुह सी का खेलहरुमा इटालियन क्लव एएस रोमाले अजरबैजानको क्लव काराबागलाई १–० ले हरायो । त्यस्तै इंगलिस क्लव चेल्सी र स्पेनिस क्लव एथ्लेटिको मड्रिडले १–१ गोलको बराबरी खेले ।
यो समुहबाट रोमा र चेल्सी अर्को चरणमा पुगे ।
यसैगरी समुह डी का खेलहरुमा स्पेनिस क्लव बार्सीलोनाले पोर्चुगिच क्लव स्पोर्टिङलाई २–० ले हरायो ।
त्यस्तै इटालियन क्लव युभेन्टसले ग्रिसको ओलम्पियाकोसलाई २–० ले नै हरायो । यो समुहबाट बार्सीलोना र युभेन्टस नक आउट चरणमा प्रवेश गरेका छन् ।
बुधबार राति पनि समुह इदेखि एचसम्मका आठ खेल हुँदैछन् ।
समुह इ बाट लिभरपुल र स्पार्ताक मस्को तथा मारिबोर र सेभिल्ला, समुह एफबाट फेयनुर्ड र नापोली तथा सक्तर दोनेस्क र म्यानचेस्टर सिटी, समुह जीबाट एफसी पोर्टो र मोनाको तथा लेप्जिग र बेसिक्टास, समुह एचबाट रियाल मड्रिड र बोरुसिया तथा टोटनह्याम र निकोसिया भिड्दै छन् ।
