म्यानचेस्टर युनाइटेड गुल्टियो, चेल्सी पो दोस्रो स्थानमा उक्लियो
प्रकाशित २०७४ पुष १६ आइतबार
167
Shares
काठमाडौं । इंगलिस प्रिमियर लिग फुटबलमा यसपटकको उपाधि म्यानचेस्टर सिटीले जित्ने पक्का जस्तै भइसकेका अवस्थामा दोस्रोदेखि छैटौंसम्मको दौड भने रोचक हुने देखिएको छ ।
२० खेलबाट ५८ अंकको सिटी शिर्ष स्थानमा छ भने एक खेल बढी खेलेको चेल्सी ४५ अंकबाट दोस्रो स्थानमा उक्लेको छ । शनिबार राति चेल्सीले स्टोक सिटीलाई ५–० ले हरायो ।
घरेलु मैदानमा खेलेको चेल्सीका लागि रुइडिगर, ड्रिंकवाटर, रोड्रिग्वेज, विलियन र जाप्पाकोस्टाले एक एक गोल गरे ।
निरन्तर दोस्रो स्थानमा रहेको म्यानचेस्टर युनाइटेड भने साउथह्याम्पटनसंग घरेलु मैदानमा गोलरहित बराबरीमा रोकिएपछि ४४ अंकसहित तेस्रो स्थानमा झरेको छ ।
शनिबार रातिका खेलमा बर्नमाउथले एभर्टनलाई २–१ ले, लिभरपुलले लेस्टरलाई २–१ ले, स्वान्सीले वाट्फोर्डलाई २–१ ले नै हरायो ।
हडर्सफिल्ड र बर्नली तथा न्युकासल र ब्राइटनले गोलरहित बराबरी खेले ।
४१ अंकबाट लिभरपुल चौथो, ३७ अंकबाट टोटनह्याम र आर्सनल पाँचौं र छैटौं स्थानमा छन् ।
