-
-
-
-
काठमाडौं । इंगलिस प्रिमियर लिग फुटबलको जारी सिजनको एकमात्र अपराजित टिम म्यानचेस्टर सिटी विजयी यात्रामा फर्केको छ ।
२१ औं खेलमा क्रिस्टल प्यालेससंग गोलरहित बराबरी खेलेर लगातार १९ औं जितको किर्तिमान बनाउन चुकेको सिटीले २२ औं खेलमा मंगलबार राति वाट्फोर्डलाई घरेलु मैदानमा ३–१ ले हरायो ।
सिटीलाई घरेलु मैदानमा जिताउन ३८ सेकेन्डमै राहिम स्टर्लिङले गोल गरे । १३ औं मिनेटमा काबासेलेले आत्मघाती गोल गर्दा ६३ औं मिनेटमा सर्जियो अगुएरोले गोल थपे ।
वाट्फोर्डले ८२ औं मिनेटमा ग्रेको गोलबाट सान्त्वना पायो ।
जितले म्यानचेस्टर सिटीको २२ खेलमा ६२ अंक भएको छ । यो सिजनमा सिटी २ खेलमा बराबरी र बाँकी सबैमा जित हासिल गरेको छ ।
मंगलबार रातिका अन्य खेलमा टोटनह्यामले स्वान्सीलाई २–० ले, वेष्टह्यामले वेष्टब्रोमलाई २–० ले क्रिष्टलले साउथह्याम्पटनलाई २–१ ले हरायो ।
लिगमा दोस्रो स्थानको म्यानचेस्टर युनाइटेडको ४७ अंक छ ।
