खेतबारीमै मास्टर पुगेपछि रुकुमेली किसानमा परिवर्तन

लोकेन्द्र खनाल

प्रकाशित २०७४ फागुन ९ बुधबार

रुकुम । जिल्लाका किसानले आफ्नो खेतबारीमा उत्पादन हुने कृषि उपज र उन्नत कृषि प्रविधिका विषयमा खेतबारीमै अध्ययन गर्न थालेका छन् ।

आफ्नो खेतबारीमा उत्पादन हुँदै आएको खाद्यान्न बालीसँगै तरकारी र दलहन बालीको कृषकले कृषक पाठशालामार्फत खेतबारीमा सिक्दै उत्पादन गर्न सुरु गरेका छन् ।

परम्परागत र आधुनिक कृषि उत्पादनका विषयमा प्रत्यक्ष काम गर्दै सिक्दैआएका यहाँका कृषक अहिले खेतबारीमै कृषक पाठशाला सञ्चालन गरी सिक्दै कृषि उत्पादन गर्दै आएका छन् ।

जिल्लामा लागू भएको कृषि तथा खाद्य सुरक्षा आयोजना अन्तर्गत साविकका १४ वटा गाविसका कृषकले परम्परागत र आधुनिक कृषि उत्पादनकाबीचमा तुलना गर्दै उत्पादन गर्दै नयाँ प्रविधिका विषयमा सिक्दा कृषि उत्पादनमा समेत वृद्धि भएको जिल्ला कृषि विकास कार्यालयका रुकुमका बरिष्ठ कृषि विकास अधिकृत राजेश साहले जानकारी दिए ।

कृषक पाठशाला मार्फत उन्नत प्रविधिमा व्यावसायिक कृषि खेतीतर्फ अग्रसर गराउने योजनाले पाठशाला सञ्चालन गरिएको उनले बताए ।

कृषिक समूह गठन गरी पाठशालामा सहभागी गराउने र पाठशालामार्फत सिकाउने गरिएको साहले बताए ।

जिल्ला भरमा यो बर्ष ३० ठाउँमा पाठशाला सञ्चालन गरिएको र त्यसबाट पाँच सय भन्दा बढि किसानले उन्नत कृषि प्रविधिका बारेमा खेतबारीमै जानकारी पाएको उनको भनाई छ ।

कृषकलाई खेतमै पुगेर सिकाउने हुँदा पाठशाला प्रभावकारी रहेको सिम्लीका कृषक रामबहादुर खड्काले बताए ।

यसअघि पाठशाला सञ्चालन नहुँदा कृषि प्राविधिकलाई देख्नसमेत पाइदैनथ्यो कृषक खड्काले भने, तर अहिले प्राविधिकले खेतबारीमै हामीलाई पढाउँछन् ।

पाठशालामा सिकेको सीप र ज्ञान प्रयोग गर्दा अहिले उत्पादनमा समेत वृद्धि भएको उनको भनाई छ ।