काठमाडौं । आइसीसी विश्वकप छनोट क्रिेकटको दोस्रो खेलमा पनि नेपाल हारेकाे छ । पहिलो खेलमा आयोजक जिम्बावेसँग हारेको नेपाल आफ्नो दास्रो खेलमा स्कटल्याण्डसँग ४ विकेटले हारेको हो ।

नेपाले दिएको एक सय ५० रनको चुनौती स्कटल्याण्डले ५१ बल बाँकी छँदै पार गर्‍याे । उसले ४१ ओबर ३ बल खेल्दा ६ विकेट गुमायो । स्कटल्याण्डको जितमा काइल कोएट्जरले अविजित ८८ रनको पारी खेले । अलराउण्ड प्रदर्शन गरेका बसन्त रेग्मी र लेग स्पिनर सन्दिप लामिछानेले समान २–२ विकेट लिए पनि हार जोगिएन । लगातार दुई हारसँगै नेपालको अघिल्लाे चरण पुग्ने याेजनामा धक्का लागेकाे छ । 

नेपालले टस जितेर पहिले व्याटिङ रोज्यो । कप्तान पारस खड्काले बलियो प्रतिस्पर्धी स्कटल्याण्डको बलिङ सिकारबाट नेपालको पारी जोगाए ।  पारीको रक्षार्थ उनले ७५ बलमा ६३ रन बनाए । उले ४ चौका प्रहार गरे । पारी जोगाएका उनी पछि सोलेको बलिङ सिकार भए । तर, उनकै व्याटिङ मद्दतमा लगातार दुई खेल जितेर आएको स्कटल्याण्डलाई नेपालले एक सय ५० रनको चुनौती दियो ।

खाता खोलेका सुरुवाती व्याट्सम्यान ज्ञानेन्द्र मल्ल र विकेट किपर दिलिप नाथलाई ४ रनमा गुमाएको नेपाली पारी सम्हाल्न आइपुगेका पारसलाई दिपेन्द्र सिंह ऐरी, शरद भेषावकर र आरिफ शेखसम्मले साथ दिन सकेनन् । उनीहरुले बल मात्रै खर्चिए अंक जोड्न सकेनन् । पछि सोमपालले उनलाई साथ दिए ।

५४ वल खर्चिएका सोमपालले १८ रन जोडे । उनी पनि रनआउट भए । नभन्दै नेपालले सय रन बनाएको अवस्थामा पारस आउट भए । नेपालले जम्मा १४ रन बनाएको अवस्थामा ४ जना व्याट्सम्यान गुमाइसकेको थियो । जम्मा ४७ ओभर ४ बल खेलेको नेपालले स्कटल्याण्डलाई मध्यम चुनौती दिन बसन्त रेग्मीको अविजित २४ रनको योगदान गरे ।

पहिलो खेलमा जिम्बाबेसँग १ सय १६ रनले पराजय भोगेको नेपालले स्कटल्याण्ड विरुद्धको खेलमा पनि जित हासिल गर्न सकेन ।

नेपालले स्कटल्याण्डविरुद्ध यसअघि खेलेका तीनै खेल हारेको थियो । २०१४ मा भएको विश्वकप छनोट खेलमा सक्टल्याण्डले नेपाललाई ९० रनले हराएको थियो । सन् २०१५ मा भएको विश्व क्रिकेट लिग च्याम्पियनसिप अन्तर्गत पहिलो खेलमा नेपाल ३ रनले हारेको थियो भने दोस्रो खेलमा ९ विकेटले पराजित भएको थियो ।