काठमाडौं । नेपाली राष्ट्रिय टिमका खेलाडी सन्दीप लामिछाने सम्मिलित टिम डिल्ली डेयर डेभिल्सले इन्डियन प्रिमियर लिग आइपिएल क्रिकेटमा जित हात पारेको छ । दिल्लीले बुधबार राति राजस्थान रोयल्सलाई ४ रनले हरायो ।
दिल्लीको मैदानमा भएको खेलमा वर्षाले पूरा ओभरको हुन नसकेको खेलमा दिल्ली डक वर्थ लेविस नियमानुसार ४ रनले विजयी भएको हो ।
सुरुवातमै १८ ओभरमा झारिएको खेलमा दिल्लीले १७.१ ओभर सम्भव खेलमा ६ विकेटको नोक्सानीमा १९६ रन बनायो । रिसभ पन्तले २९ बलमा ६९ रन बनाए । कप्तान श्रेयस ऐयरले ३५ बलमा ५० रन तथा पृथ्वी शाहले २५ बलमा ४७ रन बनाए ।
जवाफमा १२ ओभरमा १५१ रनको चुनौति पाएको राजस्थानले ५ विकेटको नोक्सानीमा १४६ रनमात्र बनाउन सक्यो ।
यो जितले दिल्लीलाई राहत दिएको छ । यो खेलमा पराजित भएको भए दिल्ली प्लेअफको सम्भावनाबाट बाहिरिने सम्भवतः पहिलो टिम हुन सक्थ्यो । तर अंकगणितिय सम्भावना बाँकी हुने थियो ।
अब भने दिल्ली ९ खेलबाट ६ अंकसहित छैठौं स्थानमा आएको छ । राजस्थान ६ अंकबाटै सातौं र मुम्बई इन्डियन्स ४ अंकबाट पुछारमा छ ।
शिर्ष स्थानको चेन्नई सुपर किंगसको ८ खेलबाट १२ अंक छ । १२ अंककै सनराइजर्स हैदराबाद दोस्रो स्थानमा छ । पंजाबको १०, कोलकाताको ८ र बैंगलोरको ६ अंक छ ।
