म्यान्चेस्टर सिटीको कीर्तिमानी जित, के के बन्यो कीर्तिमान ?
प्रकाशित २०७५ वैशाख २७ बिहिबार
354
Shares
काठमाडौं । इङलिस प्रिमियर लिग फुटबलमा उपाधि विजेता च्यान्चेस्टर सिटीले विभिन्न कीर्तिमान रचेको छ । बुधबार रातिको खेलमा ब्राइटनलाई ३–१ ले हराउँदै म्यान्चेस्टर सिटीले एकै एकै सिजनमा सर्वाधिक अंक जोड्ने इंगलिस क्लवको कीर्तिमान बनाएको हो ।
सिटीले यो सिजनमा एक खेल खेल्न बाँकी छँदा ३७ खेलबाट ९७ अंक बनाएको छ । सिटीले यसअघि चेल्सीले सन् २००४–५ को सिजनमा जोडेको ९५ अंकको कीर्तिमान तोडेको हो ।
सिटी कीर्तिमानका लागि अझै रोकिएको छैन । सिटीले एकै सिजनमा सर्वाधिक १०५ गोल गर्ने कीर्तिमान पनि राखेको छ ।
यो जितसंगै आइभरी कोष्टका खेलाडी याया टुरेको पनि ८ वर्षे सिटी यात्रा सकिँदैछ । उनले इत्तेहाद स्टेडियममा अन्तिम खेल खेलेका छन् ।
अरु टिमको खेल के भयो ?
बुधबार रातिको महत्वपूर्ण खेलमा टोटनह्याम हट्सपर विजयी भएको छ । टोटनह्यामले न्युकासल युनाइटेडलाई १–० ले हराएपछि शिर्ष चारभित्र रहेर लिग सकाउने निश्चित भएको छ । टोटनह्यामलाई विजयी गराउन ह्यारी केनले ५० औं मिनेटमा गरेको गोल निर्णायक बन्यो ।
जितसँगै टोटनह्याम हट्सपरले अर्को सिजनको च्याम्पियन्स लिग खेल्ने पक्का गरेको छ ।
चेल्सी चाउरिएपछि
डिफेन्डिङ च्याम्पियन चेल्सीले अहम खेलमा बराबरी खेलेपछि शिर्ष चारमा रहेर च्याम्पियन्स लिग खेल्न पाउने सम्भावना कमजोर बनेको छ । बुधबार रातिको खेलमा चेल्सीले हडर्सफिल्ड टाउनसँग १–१ गोलको बराबरी खेल्यो ।
यो बराबरीले अब चेल्सी शिर्ष चारभित्र पर्न अन्तिम खेलमा ‘मिराकल’ हुनुपर्नेछ । चेल्सीले जितेरमात्र पुग्नेछैन अन्तिम खेलमा लिभरपुल पराजित भइदिनु पर्नेछ । हडर्सफिल्ड भने यही बराबरीका कारण रेलिगेशनबाट बचेको छ ।
बुधबार रातिको खेलमा छैटौं स्थानमा रहेर लिग टुंगाउने क्रममा रहेको आर्सनल पराजित भएको छ । आर्सनललाई लेष्टर सिटीले ३–१ ले हराएको हो ।
