साउन देखि दूरसञ्चार सेवामा लाग्यो ५७ प्रतिशत कर, सेवा प्रदायकले उपभोक्ताबाटै उठाउने

प्रकाशित मिति : २०७५ जेठ १८ शुक्रबार
फाइल तस्विर

काठमाडौं । ईन्टरनेट प्रदायक संस्था (आइस्पान) र  कम्युटर एसोसिएशन अफ नेपाल (क्यान) महासंघले दुरसञ्चार सेवा शुल्क बढाउने सरकारी निर्णयप्रति आपत्ति जनाएको छ ।  रिपोर्टर्स क्लब नेपालमा क्यान महासंघ र आईस्पानले संयुक्त रुपमा पत्रकार सम्मेलन गरेर आव २०७५-०७६ को नीति तथा कार्यक्रममा समावेश गरिएको दुरसञ्चार सेवा शुल्क १३ प्रतिशतले बढाईनु सर्वसाधारणका लागि हितप्रिय नभएको स्पष्ट पारेको छन् ।

ईन्टरनेटमा यसअघि नै ग्रामिण दुरसञ्चार कोष शुल्क २ प्रतिशत, रोयल्टी ४ प्रतिशत, फाईवरमा भन्सार १५ प्रतिशत, ब्याण्डविथमा टिडिएस १० प्रतिशत, भ्याट १३ प्रतिशत र नयाँ थपिएको १३ प्रतिशतलाई जोड्दा ५७ प्रतिशत कर लाग्नेछ ।
अहिले थपिएको कर ईन्टरनेट सेवा प्रदायकले उपभोक्तबाटै उठाउने उनीहरुको भनाई छ । महासंघ र संघद्धारा जारी गरिएको विज्ञप्तीमा भनिएको छ,‘यसले गर्दा उपभोक्तलाई ठूलो मार पर्न जान्छ, ईन्टरनेट महँगो भए सर्वसाधरणको पुहँचमा पुग्दैन, ईन्टरनेटको विस्तार नहुनु भनेको सरकारले चाहेजस्तो सुशासन कायम हुन नसक्नु हो।’

संघ र महासंघद्धारा जारी विज्ञप्तीमा भनिएको छ,‘सम्माननीय प्रधानमन्त्री केपी शर्मा ओलीज्यूले ल्यापटप चलाउन नसक्ने मन्त्रीहरुलाई विदाई गर्ने घोषणा गरिसक्नुभएको छ, तर यस्तै अवस्थामा सरकारले ल्याएको बजेट, नीति तथा कार्यक्रमहरु ईन्टरनेटमैत्री छैनन्, संघीय संसदमा सार्वजनिक गरेको बजेटले ईन्टरनेटमा लगाउन घोषणा गरेको दुरसञ्चार सेवा शुल्क ईन्टरनेटको विस्तारमा बाधा पुर्याउने खालको छ।’

कम्युटर एसोसिएशन अफ नेपाल महासंघका अध्यक्ष हेमन्त चौरासियाले नीति तथा कार्यक्रम राम्रो भएपनि केही कुराहरुले जनताको पक्षमा काम गर्न नसक्ने जिकिर गरे । उनले भने,‘जनतामा सर्वशुलभ ईन्टरनेट र सञ्चारको माध्यायममा जोड्ने सरकारी नीति तथा कार्यक्रमले अर्काेतिर महंगीले सञ्चारप्रतिको आकर्षण घट्ने सम्भावना उत्तिकै रहन्छ, सरकारले जनताको जन–जीवनमा पर्ने यस्ताखाले करको बारेमा सोच्नुपर्छ, हाम्रो आग्रह तत्काल नीति बनाएर यसका बारेमा उचित कदम लिनुपर्छ ।’

त्यस्तै कार्यक्रममा ईन्टरनेट सेवा प्रदायक संघ आइस्पानका अध्यक्ष दिलिप अग्रवालले सञ्चार शुल्कसम्बन्धि छलफल नगरि शुल्क वृद्धि गरेको गुनासो पोखेका छन् । उनले भने,‘सरकारी नीति तथा कार्यक्रम एकातिर छ, शुल्क बढाउने काम अर्कोतिर छ, जनतालाई सञ्चारको पहँुचमा ल्याएर विश्व दुनियासँग प्रतिष्पर्धामा उत्रिन सक्ने दक्ष जनशक्ति उत्पादन गर्नुपर्ने हो, तर सरकारले यस्तो क्षेत्रमा कर बढाएर के गर्न खोज्दैछ, यो सञ्चार शुल्क बढाउँदा सेवा प्रदायक कम्पनीलाई कुनै असर पर्दैन, तर जनतालाई महँगीले असर गर्छ, हामीलाई कुनै असर हुँदैन, तर जनताको पक्षमा काम गर्ने सेवा प्रदायक कम्पनी भएको नाताले हामीले यो पत्रकार सम्मेलन गर्नुपरेको हो ।’

उनले अघि थपे,‘यहाँभन्दा पहिले प्रत्येक महिनाको एक हजारमा ईन्टरनेट सेवा उपलब्ध गराउँदै आएका संस्थाले सरकारले बढाएको करको आधारमा शुल्क लिएर सरकारलाई कर तिर्नुपर्ने हुन्छ, अबका दिनमा एक सय ३० रुपैयाँले बढि कर तिर्नुपर्ने स्थिति सिर्जना भएको छ, सर्वसाधारण जनताको पक्षमा यो कर भएन, हामी सरकारलाई यसका बारेमा सुझाव दिन्छौं र खबरदारी समेत गर्नेछौं ।’

त्यस्तै उनीहरुले सरकारी यो निर्णयबाट उपभोक्तालाई थप आर्थिक भार पर्न गई ईन्टरनेटको मुल्य महँगो हुन जाने समेत बताएका छन् । विज्ञप्तीमा भनिएको छ,‘ईन्टरनेटमा बढाएको दुरसञ्चार सेवा शुल्क तुरुन्त फिर्ता लिन आग्रह गर्दछौं।’

 

नयाँ