मदिरा निषेधले ल्याएको खुशी 

रमित बिक प्रकाशित मिति : २०७५ भदौ १८ सोमबार
तस्वीर – मदिरा व्यवस्थित गर्नको लागि मदिरा सेवनकार्ड । 

बाजुरा । महिना बित्यो जैशीदेवी धामीको घरमा कलह नभएको । दिन नबिराई धामीको घरमा कलह हुन्थ्यो । खेतबारीको काम सकिएपछि जैशी घर लाग्थिन् । उनका श्रीमान स्थानीय पसलमा लाग्थे । जब गौमुल गाउँपालिकाले मदिरा निषेधको निर्णय गर्यो, त्यो मिति देखि नत घरमा कलह भएको छ, नत पैसा नै खर्च । 


हाल धामीको परिवारमा मात्र होइन गौमुल–३ पाते गाउँको सिंगो बस्ती नै शान्त छ । गाउँमा मदिराका पेटी नगएको तीन हप्ता बढी भयो भन्छन् वडा अध्यक्ष मानबहादुर बोहरा । मदिरा बन्दी गरिएकोमा गाउँलेहरु धेरै खुशी छन् । खुशी हुनेमा पनि महिला र बालबालिकाको संख्या बढी छ । 


मदिरा खाएर हल्ला गर्ने, एक आपसमा गाली बेइज्जती गर्ने काम पनि बन्द भएको छ । गाउँमा मदिरा खानेको संख्या नै भेटिन छोडेको स्थानीय प्रमिला धामीले बताईन् । रोकाया सोही गाउँपालिका वडा नं ४ घोगाला बस्तीकी हुन् । घोगाला गौमुलकै बढी मदिरा विक्री वितरण हुने स्थान हो । 


गाउँका स्थानीय पसलमा पनि मदिरा विक्री वितरणमा पूर्ण बन्द गरिएको स्थानीय धर्म रोकायाले बताए । आफूलाई खान पाए पुग्छ भन्ने मान्यता राख्ने पुरुष यतिबेला गाउँपालिकाको निर्णयको स्वागत गरी बसेको अवस्था छ । पैसा माग्ने, घरको समस्या नबुझ्ने गर्थे, घरमा सानो सानो मदिराकै कारण भनाभन भईरहन्थ्यो, कापी किताबका लागि जुटाएको रकम पनि मदिरामै सक्ने गथ्र्ये गाउँपालिकाले सही निर्णय गरिदियो, स्थानीय जैशीदेवी धामीले बताईन् । 


बढ्दो मदिरा सेवनले गाउँमा झै झगडा बढेको र आपसी द्धन्द्ध सिर्जना हुने अवस्था आउन नदिन मदिरा व्यवस्थित गर्ने नीति लिएको गाउँपालिका अध्यक्ष हरिबहादुर रोकायाले बताएका छन् । मदिरा व्यवस्थापनको निर्णयसँगै महिलाहरु खुसी भएका छन् । निर्णयको स्वागतमा महिला अधिकार मञ्चले गाउँमा र्याली जुलुससहित प्रर्दशन गर्ने गरेका छन् ।


निर्णयको सफल कार्यान्वयन गर्नु पर्नेमा जोड दिन गाउँगाउँमा कार्यक्रम गर्ने गरिएको महिला अधिकार मञ्चका अध्यक्ष सरिता रोकायाले बताईन् । उसो त मदिरा व्यवस्थापन गर्ने गरिएको निर्णयको एक महिनाको अवधिमा आपसी विवाद र झगडाका घटनाहरु पनि कम भएको गाउँपालिका उपाध्यक्ष सीता रोकायाले बताईन् ।


गौमुल गाउँपालिकामा ६ वटा वडा रहेका छन् । सबै वडाका अध्यक्षलाई मदिरा सेवन गर्नेलाई मदिरा सेवन कार्ड खरिद गरेर मात्र खान पाउने र आफूखुशी गाउँपालिकाको निर्णय बेगर मदिरा सेवन गरे कानुनी कार्वाही गर्ने निर्णय गरिएको न्यायीक समिति अध्यक्षसमेत रहेकी उपाध्यक्ष सीता थापा रोकायाले बताईन् ।


न्यायीक समितिमा मदिराकै कारण झगडा भएको भन्ने उजुरी पनि एक महिनाको अवधीमा नआएको पाईएको छ । त्यसअघि फोन मै भएपनि गाली गरेको, कुटपीट गरेका गुनासो आउने गरेका थिए, पछिल्लो एक महिनाको अवधीमा सुन्नमा आएको छैन । गाउँमा उत्पादन गरिने घरेलु मदिरा पूर्ण रुपमा प्रतिवन्ध गरिएको छ । 


युवामा बढ्दो दुव्र्यसनी र पारिवारीक रुपमा हुने आर्थिक नोक्सानीलाई ध्यानमा राखेर जिल्लाका त्रिबेणी नगरपालिका र खप्तड छेडेदह गाउँपालिकाले पनि मदिरा पूर्ण रुपमा बन्द गरेका छन् । जुन निर्णयले गाउँमा सकारात्मक प्रभाव परेको छ । 

 

नयाँ