- सुन चाँदी दर
- विनिमय दर
- नेपाली पात्रो
- राशिफल
काठमाडौं । स्पेनिस ला लिगा फुटबलमा रियाल मड्रिड अगाडि लागेको छ । लिग अन्तर्गत शनिबार राति एस्पान्योललाई घरेलु मैदानमा १–० ले पराजित गर्दै रियाल लिग तालिकाको शीर्ष स्थानमा पुगेको हो ।
रियालको जितमा पहिलो हाफको अन्त्यतिर मारको एसेन्सियोले गरेको गोल नै निर्णायक सावित भयो । ४१ औं मिनेटमा मिडफिल्डर लुका मोड्रीचको प्रहार एसेन्सियोलाई डीफ्लेक्ट हुँदै गोलमा परिणत भएको थियो ।
रेफ्रीले भिडियो असिस्टेन्ट रेफ्री भीएआरको सहायता लिँदै निकै बेरपछि गोललाई मान्यता दिएका थिए । अन्त्यमा यहि गोल नै खेलमा निर्णायक बन्न पुगेको थियो । अपराजित रियलको लिगमा यो चौथो जित हो ।
पाहुना टोली एस्पान्योलका लागि बोर्जा इग्लेसिसको प्रहार क्रसबारमा लाग्नु दुर्भाग्यपूर्ण रहयो । रियालका पूर्व गोलरक्षक डिएगो लोपेजले खेलको अन्त्यतिर सर्जियो रामोसको प्रहार बचाउँदै खेलमा एस्पान्योलको सम्भावना कायम राखेका थिए ।
रियालले अपेक्षा गरेअनुसार आक्रमण बुन्न सकेको थिएन । रोनाल्डोको अनुपस्थितिमा आक्रमण केहि फितलो भएपनि इस्को, एसेन्सियो र बेन्जेमाको जोडीले प्रयास जारी राखे । प्रशिक्षक जुलेन लोपेटेगुईले ग्यारेथ बेललाई यस खेलमा प्रयोग नै गरेनन् ।
यस जितसँगै रियालले बार्सिलोनालाई उछिन्दै शीर्ष स्थानमा कब्जा जमाएको छ ।
आइतबार हुने खेलमा बार्सिलोनाले बराबरी वा जित हासिल गरेको खण्डमा रियाल दोस्रो स्थानमा झर्नेछ । बार्सिलोनाले आइतबार गिरोनाको सामना गर्दैछ । रियालले ५ खेलमा १३ अंक बटुलेको छ भने बार्सिलोना ४ खेलमा १२ अंक जोड्न सफल रहेको छ ।
अन्य खेलहरुको नतिजा यस्तो छ –
रियाल सोसिडाडले हुएस्कालाई १–० ले हरायो । डेपोर्टिभोले राए भाएकानोलाई ५–१ ले, एथलेटिको मड्रिडले गेटाफेलाई २–० ले, आइबरले लेगनेसलाई १–० ले हरायो ।
रियाल भल्लाडोलिड र सेल्टाभिगोले ३–३ को बराबरी खेल्यो ।