काठमाडौं । च्याम्पियन्स लिग फुटबल अन्तर्गत बुधबार रातिको खेलमा फ्रेन्च क्लव पेरिस सेन्ट जर्मेन पीएसजीले फराकिलो जित निकालेको छ ।
समूह ‘सी’ को खेलमा पीएसजीले सर्बियन क्लव रेड स्टार बेलग्रेडलाई ६–१ को फराकिलो अन्तरले पराजित गरेको हो ।
ब्राजिलियन स्टार नेयमारले ह्याट्रिक पूरा गरे । पहिलो खेलमा लिभरपुलसँग ३–२ ले पराजित भएको पीएसजीका लागि ब्राजिलियन सुपरस्टार नेयमारले गोलको खाता खोलेका थिए ।
नेयमारले फ्रिकिकमा सीधै गोल गर्दै पीएसजीलाई सुरुआती अग्रता दिलाएका थिए । बेलग्रेडका डिफेन्डर भुजादीन साभिचले नेयमारलाई फाउल गरेपछि प्राप्त फ्रिकिकमा उनी आफैंले गोल गरेका थिए ।
त्यसको दुई मिनेटमै नेयमारले अग्रता दोब्बर पारे । उनले किलियन एमबाप्पेको पासमा गोल गरेका थिए । ३७ औं मिनेटमा एडिन्सन कभानीले पीएसजीको अग्रतालाई तीन गोलमा पुर्याए । पहिलो हाफ सकिन ३ मिनेट बाँकी रहँदा एन्जल डी मारियाले उत्कृष्ट गोल गरे । उनले थोमस मुनिएरको क्रसमा ब्याकहिल गर्दै गोल गरेका थिए ।
युवा फरवार्ड किलियन एमबाप्पेले ७० औं मिनेटमा गोल गर्दै पीएसजीलाई ५–० ले अगाडि बढाए । उनले एडिन्सन कभानीको पासको सदुपयोग गर्दै गोल गरेका थिए । बेलग्रेडका लागि जर्मन मिडफिल्डर मारको मारिनले ७४ औं मिनेटमा गोल फर्काए । उनले लोरेन्जो एबेचिलोको पासमा राम्रो गोल गरे ।
नेयमारले खेलको ८१ औं मिनेटमा दोस्रो फ्रिकिक गोल गर्दै आफ्नो ह्याट्रिक पूरा गरे । एबेचिलोले उनलाई पेनाल्टी क्षेत्रबाहिर लडाएपछि प्राप्त फ्रिकिकमा नेयमारले सिधै गोल गरेका थिए ।
नेयमारले ह्याट्रिकसँगै च्याम्पियन्स लिगमा ३० गोल पनि पूरा गरेका छन् ।
यो जितसंगै पीएसजीले अंकको खाता खोलेको छ । समूहमा पीएसजी र बेलग्रेडसँगै इटालियन क्लब नेपोली र इंगलिश क्लब लिभरपुल रहेका छन् ।
लिभरपुल बुधबार राति नापोलीसंग १–० ले विजयी भएको छ ।
