काठमाडौं । रसिया विश्वकप फुटबलमा छनोट समेत हुन नसकेर दिनानुदिन खस्किँदै गएको इटालीले जितको मुख देख्न पाएको छ । यूईएफए नेशन्स लिग ए अन्तर्गत इटालीले पोल्याण्डविरुद्ध १–० गोलअन्तरको संघर्षपूर्ण जित निकालेको हो ।
पोल्याण्डको घरेलु मैदानमा इन्जुरी समयको अन्तिम मिनेटमा क्रिष्टियानो बिराघीले केभिन लासांगाको पासलाई सदुपयोग गरी इटालीलाई महत्वपूर्ण तीन अंक दिलाएका हुन् ।
हाफ टाइम अगाडि इटालीको प्रहार दुई पटक पोलमा ठोक्किएर फर्केको थियो ।
यो जित रोबर्टो मान्सिनीको पहिलो प्रतिस्पर्धात्मक जित हो । यो जितले हारको डेडलक पनि तोडिएको छ ।
जितसँगै लिग ए को समूह तीनमा रहेको इटालीले शीर्ष स्थानको पोर्चुगलमाथि दवाब कायमै राखेको छ । ३ खेलबाट इटालीको ४ र पोल्याण्डको १ अंक छ । २ खेल खेलेको पोर्चुगलको ६ अंक छ ।
पहिलो खेलमा इटालीले पोल्याण्डसंग १–१ को बराबरी खेलेको थियो भने पोर्चुगलसंग १–० ले पराजित भएको थियो ।
