जनकपुरधाम । सडक फराकिलो गर्ने निर्णय विपरित जनकपुरधाम उपमहानगरपालिकाले शिव चोकमा सडकलाई साँगुरो बनाएको छ ।सडकको मापदण्ड अनुसार नापी गरी जग्गा छुट्टयाईसके पनि हाल निजी जग्गा छाडेर सडकलाई साँगुरो बनाईएको छ ।
शिवचोक स्थित होण्डा मोटरसाईकलको पुरानो शो रुमको जग्गा जोगाउन सडकलाई साँगुरो बनाईएको आरोप नेपाली काँग्रेस धनुषाका जिल्ला सदस्य गणेश झाले लगाएका छन् । मापदण्ड विपरित सडकलाई साँगुरो गर्न मोटो रकमको चलखेल भएको र त्यसमा नगरप्रमुख लालकिसोर साह स्वयंको संलग्नता रहेको उनले आरोप लगाए ।
‘शिवचोकमा जग्गाको मुल्य अत्यधिक छ’झाले भने, महँगो जग्गा जोगाउन मोटै रकमको चलखेल भएको छ ।उपमहानगरपालिकाले जग्गा छुट्टयाउन चिनो लगाएको भन्दा झण्डै चार फिट बढी जग्गा छाडेर सडकलाई साँघुरो बनाईएको उनले आरोप लगाए । वडा अध्यक्ष परमेश्वर साहले सडकको जग्गा मिचेको आरोपमा उनलाई थुनाएर आफै डोजर चलाउन लगाउने मेयर साहले शिव चोकमा मोटो रकम लिएर सडक साँगुरो पार्न थालेको बताए ।
शिवचोक–भानुचोक सडकबाट जनकपुर उद्योग वाणिज्य संघ तर्फ जाने अत्यन्त महत्वपूर्ण बाटोलाई सबै मापदण्ड मिचेर १४ फिटमा सिमित गर्ने प्रयासमा नगर प्रमुख रहेका छन् । सडक छेउका बासिन्दा, वडाअध्यक्ष लगायतले कम्तिमा १८ फिट फराकिलो सडक बनाउन दवाब दिए पनि एकजना दिलिप जालानको जग्गा जोगाउन सडकलाई १४ फिटमा सिमि त गर्न लागिएको स्थानीय बासिन्दाहरुले जनाएका छन् ।
स्थानीय बासिन्दाहरुले १८ फिट भन्दा कममा सडक बनाउन नदिने अडानमा छन् । मुखमा करिब पचास मिटर सडक हालपनि १२ फिट रहेको छ ।व्यापार संघको अगाडीदेखि सडक १८ फिट र सो भन्दा बढी रहेको छ ।
