आइकार्डीले प्रमाणित गरे गोल गर्न धेरै बल छुनै पर्दैन
प्रकाशित २०७५ कार्तिक ५ सोमबार
249
Shares
काठमाडौं । इटालियन सिरी ए फुटबलमा इन्टर मिलानका कप्तान माउरो आइकार्डीले कमालको प्रदर्शन गरेका छन् । उनको गोलले नै इन्टरमिलानले खेल त जित्यो नै उनले अचम्मकै कीर्तिमान राखेका छन् ।
मिलान डर्बीको खेलमा इन्टर मिलानले एसी मिलानलाई आइतबार राति १–० ले हरायो । इन्जुरी समयको दोस्रो मिनेटमा आइकार्डीले गोल गर्दै इन्टर मिलानलाई जिताए ।
अचम्मको कीर्तिमान कस्तो भने कप्तानले पूरै खेलभरि १५ पटक मात्रै बल छुन पाए । तर तिनै खेलाडीले अन्तिम समयमा गोल गरेर टिमलाई जिताए ।
२२२ औं मिलान डर्बीमा अर्जेन्टाइन आइकार्डीले गोल गर्दै इन्टरलाई जिताएसंगै इन्टर तेस्रो स्थानमा पुगेको छ ।
इन्टर मिलानको ९ खेलबाट १९ अंक भएको छ । १२ अंक जोडेको एसी मिलान १२ औँ स्थानमा छ ।
शीर्ष स्थानको युभेन्टसको ९ खेलबाट २५ अंक छ भने दोस्रो स्थानको नापोलीको २१ अंक छ ।
